3-февралдиз Докъузпара районда альпинизмдай Россиядин чемпионат шад гьалара ачухна. И зурба мярекатда Россиядин 13 региондай 12 командади иштиракда. Докъузпара райондин Къурушрин хуьруьн сергьятра авай дагълариз Красноярский, Хабаровский, Ставропольский, Приморский крайрай, Санкт-Петербургдай, Самарский, Омский, Новосибирский, Воронежский областрай, Ингушетия ва Татарстан республикайрай альпинистар атанва.
Важиблу мярекатдиз гьазурвилер акунин гьакъиндай «Докъузпара район» МР-дин кьил Абдурагьим Алискерова виликамаз талукь ксарал тапшурмишнавай.
Чемпионат ачухунин мярекатдал Абдурагьим Алискерова мугьманрихъ, чемпионатдин иштиракчийрихъ элкъвена тебрикдин гафар лагьана. Ихьтин гегьенш мярекат Докъузпарада тешкилуник кьил кутунай райондин кьили РФ-дин спортдин министерстводиз, РФ-дин туризмдин министерстводиз, РД-дин спортдин министерстводиз, РД-дин туризмдин ва халкьдин художественный сеняткарвилин рекьяй министерстводиз, Россиядин ва Дагъустандин альпинизмдин федерациядиз чухсагъул малумарна.
Къейдна кIанда хьи, чемпионат ачухунин мярекатда Россиядин альпинизмдин федерациядин вице-президент ва классический альпинизмдин комиссиядин председатель Александр Пятницина, РД-дин туризмдин ва халкьдин художественный сеняткарвилин рекьяй министр Расул Ибрагьимова, РД-дин физический культурадин ва спортдин министрдин сад лагьай заместитель Зайнал Салаутдинова, Ингушетиядин альпинизмдин федерациядин президент Висан Юсупова, РД-дин альпинизмдин федерациядин президент Петр Леонова, Ахцегь райондин кьил Осман Абдулкеримова, Сулейман-Стальский райондин кьил Нариман Абдулмуталибова, Хив райондин кьилин везифаяр вахтуналди тамамарзавай Агъамирзе Гьамзабегова, Докъузпара райондин депутатрин Собранидин председатель Абас Абасова, Докъузпара райондин прокурор Мисбагь Назирова ва масабуру иштиракна.
РД-дин кьил Владимир Васильеван ва Гьукуматдин председатель Артем Здунован патай иштиракчияр Расул Ибрагьимова тебрикна. Къейд авурвал, чемпионат кьиле тухунин макьсад спортсменрин арада дуствал мягькемарун, РД-дин муниципальный районрал туристрин дестеяр желбун, альпинизм ва туризмдин маса жуьреяр машгьур авун я.
Мярекатдал тебрикдин гафар Зайнал Салаутдинов, Петр Леонов, Александр Пятницин ва масабур рахана.
«Лезги газет»
