Къе, 4-февралдиз, «Лезги газетдин» редакциядиз выставкайрин «АНЖИЭКСПО» компаниядин генеральный директор Мукаил Исмаилов мугьман хьанвай. Вични ичIи гъилди атанвачир: хайи чIалал акъатзавай газетдин къуллугъчийриз мергьяматлу хци вичин патай хъвадай яд михьдай «Барьер Экстра» фильтраяр пишкешна.

Мукаил Исмаилован бинеяр Хив райондин Кашанхуьряй я (мугьманди вичи лугьузвайвал — Гушанхуьряй). Фадлай карчивилел машгъул ада алай вахтунда са шумуд компаниядиз регьбервал гузва.

«Лезги газетдин» редакциядин коллективдихъ галаз акур чIавуз Мукаил Исмаилова цихъ инсандин сагъламвал патал гьихьтин метлеб аватIа, яд гьикI михьдатIа, адахъ гьихьтин кьетIенвилер аватIа ихтилатна. Адан гафарай малум хьайивал, хъсан ери авай михьи цихъ аламатдин гьунарар ава: ахьтин ци жуьреба-жуьре азарарни кваз сагъар хъийизва.

Гуьруьшдин эхирдай «Лезги газетдин» кьилин редактор Мегьамед Ибрагьимова ва жавабдар секретарь Шихмурад Шихмурадова Мукаил Исмаиловаз редакциядиз мугьман хьунай, савкьатар гунай сагърай лагьана. Къуй чи кьегьал стхадин чандин сагъвални еке агалкьунар хьурай!

«Лезги газет»