1-февралдиз Сулейман-Стальский райондин кьил Нариман Абдулмуталибов «Агростал» ООО-дин векил Тельман Ибрагьимовахъ галаз гуьруьшмиш хьана. Идакай «Лезги газетдиз» райондин администрациядин пресс-къуллугъди хабар гузва.

Гуьруьшдин вахтунда Т.Ибрагьимова Векьелар хуьруьн мулкара 300 гектардин майдандал гьайвандарвилин чIехи комплекс эцигунин гьакъиндай кьилиз акъудзавай инвестициядин проектдин гьакъиндай райондин кьилиз ихтилатна. Алай вахтунда а участокдиз чиргъ вегьенвай рехъ туькIуьрнава (4 км) ва 1,6 километрдиз электричестводин линиярни тухванва.

Тельман Ибрагьимова малумарайвал, целди таъминарунин месэла вилик кума. Райондин кьил Н.Абдулмуталибова Чирагъчай вацIун кьере цин къуй гьазурдай чка тайинарун ва са куьруь вахтунда и месэла тамамарун патал «УМИЗ», «УСХП» идарайрин руководителрал, Алкьвадар хуьруьн администрациядал тапшурмишна.

Къейдзавайвал, малдарвилин комплексда 200-далайни гзаф нек гудай калер, жунгавар ва лапагар хуьда. Райондин кьили инвестордиз куьмек гуз гьазур тирди лагьана.

«Лезги газет»