Алай йисан 17-январдиз къурушвийрив саки 55 йисуз математикадайни физикадай дерин чирвилер гайи Дагъустандин лайихлу муаллим Азиз Шемсединович Пиримов кечмиш хьана лагьай чIулав хабар агакьна.
А.Ш.Пиримов 1928-йисан 15-майдиз Ахцегь райондин Къурушрин хуьре зегьметчи хизанда дидедиз хьана. Ада 7-класс Къурушдал, 10-классни Миграгърин юкьван школада лап хъсан къиметралди акьалтIарна. Математикадал ашукь тир Азиз Шемсединовича кIелунар ДГУ-да давамарна. Вад йисалай А.Пиримов кьилин образование авай пешекар яз ЦIийи Къурушрин юкьван школадиз кIвалахиз хтана.
Азиз Шемсединовича зегьмет чIугваз эгечIай сифте йикъалай вич дерин чирвилер авай пешекар тирди агалкьунралдини краралди тестикьарна. Ам муаллимвилин везифайрив рикIивай, намуслудаказ эгечIна. Гьавиляй ада тарс гайи гьар сада Азиз муаллимдин тIвар гьуьрметдивди кьазва ва адан тарифарзава.
Азиз Пиримовахъ аялриз чирвилер гунин рекьяй вичин махсус, кьетIен тежриба авай. Ада тарсуна гузвай чирвилер аялри регьятдиз кьатIузвай, кьабулзавай.
А.Ш.Пиримова саки 30 йисуз школада кIелунрин рекьяй чIехи классрин завучвиле кIвалахна. Гьикьван четин тиртIани, ам садрани руьгьдай аватнач. Къурушрин школа Хасавюрт районда чирвилерал гьалтайла виридалайни вилик жедай, аялри олимпиадайра анжах кIвенкIвечи чкаяр кьадай.
Азиз муаллим Къурушрин хуьре сифтебурукай яз “Дагъустандин лайихлу муаллим” тIварцIиз лайихлу хьанай. Ам Дагъустандин образованидин министерстводин, Хасавюрт райондин образованидин управленидин патай гьакъисагъ зегьметдай цIудралди гьуьрметдин грамотайризни медалриз лайихлу хьана. Азиз Шемсединович эхирдалди вичин пешедиз вафалу хьайи гьуьрметлу муаллим тир.
“Къурушрин сес” газетдин редколлегияди, хуьруьн юкьван кьве школадин коллективри Пиримов Азиз Шемсединовичан рухвайризни рушаз, мукьва-кьилийриз, дериндай хажалат чIугуналди, башсагълугъвал гузва. Азиз муаллим ярар-дустарин, тарсар гайи аялрин рикIера яргъалди амукьда. Аллагьди рагьмет гурай вичиз!
