И йикъара Мегьарамдхуьруьн районда, Советрин Союздин Игит Абас Исрафилован тIварунихъ галай 1-нумрадин ДЮСШ-да, азаддиз кьуршахар кьунай Дагъустандин кIвенкIвечивал патал зонадин акъажунар кьиле фена. Идакай «Лезги газетдиз» райондин администрациядин пресс-къуллугъди хабар гузва.
Афгъанистанда чпин буржи тамамарай дагъустанви аскерар рикIел хкуниз талукьарнавай акъажунра 2004-2005-йисара дидедиз хьайи жегьилри иштиракна.
Къейдна кIанда хьи, эхиримжи вахтара и районда спортдин мярекатар мукьвал-мукьвал тешкилзава. И сеферда кьиле фейи акъажунрин кьилин макьсадни спортдин азаддиз кьуршахар кьунин жуьре машгьур авун, жегьил спортсменрин алакьунар вилик тухун ва Дагъустандин кIвенкIвечивилин акъажунрин кьиблепатан зонадин акъажунра иштиракдай команда хкягъун тир.
ЮТО-дин районрай ва шегьеррай 112 спортсменди, абурукай ибарат тир 14 командади иштиракна.
Турнирдин нетижада Дагъустандин кIвенкIвечивал патал 1-3-февралдиз Хасавюртда кьиле фидай акъажунра иштиракдай спортсменар тайинарна. Гъалибчийризни хъсан чкаяр кьурбуруз грамотаярни медалар гана.
«Лезги газет»
