17-январь Россияда Ленинград фашистрин гьалкъадай ахкъудна тамамдаказ азад хъувурдалай инихъ 75 йис тамам хьун къейдзава.
«Лезги газетдиз» Сулейман-Стальский райондин администрациядин пресс-къуллугъди хабар гузвайвал, и лишанлу йикъаз талукьарна, Герейханов хуьруьн ктабханада и хуьруьн 1-нумрадин мектебдин 6-классдин ученикар патал «Ленинграддин блокададин аялар» темадай викIегьвилин тарс тухвана.
Ктабханадин заведующий Эльза Рустамовади аялриз гьалкъада гьатай Ленинграддин гъвечIи агьалийри кашахъ, аяздихъ, кьиникьихъ галаз гьикI женг тухванатIа, дяведин сифте йикъарилай абур чIехибуруз куьмекар гуз гьикI алахънатIа, гьадакай ихтилатна.
Мярекатдин эхирдай иштиракчийрин фикирдиз «МуьтIуьгъиз тежер шегьер» лишандик кваз тешкилнавай выставка гъана.
«Лезги газет»
