Мегьарамдхуьруьн райондин кьил Фарид Агьмедова школьникрин федеральный гуманитарный «Умницы и умники» олимпиадада агалкьунар къазанмишай Зейнаб Аюбовадихъ галаз гуьруьш кьиле тухвана. Идакай «Лезги газетдиз» райондин администрациядин пресс-къуллугъди хабар гузва.

Гуьруьшда Зейнабан дидедини иштиракна. Зейнабаз айфон къачудай фикир авайдакай чир хьайила, райондин кьили адаз и телефон ва ноутбук пишкешна.

«Чи уьлкведин меркезда Зейнаба чи райондин ва республикадин патай лайихлудаказ иштиракна. Ихьтин акьуллу аялар хьунал чна дамахзава. Са шакни алачиз, ихьтин аялрин алакьунар вахтунда винел акъудун ва абур гележегдани вилик тухун гзаф важиблу я. Бажарагъ авай жегьилриз куьмек гун чи кьилин везифа я», — кхьизва Ф.Агьмедова Инстаграмда авай вичин хсуси чина.

Къейд ийин, гуьруьшдин сергьятра аваз райондин кьили веледдиз хъсан тербия гунай Зейнабан диде-бубадизни чухсагъул малумарна. Алакьунар авай жегьилриз куьмек гунай райондин кьилиз вичин нубатда З.Аюбовади сагърай лагьана.

Къуй мартдин сифте кьиле Москвада кьиле фидай ярумчух финалдани Зейнаба гъалибвал къачурай.

«Лезги газет»