Инсанри сада-садаз багъишзавай кIанивал аламатдин гьисс я. Адакай дуьньядин гьар са пипIяй акъатай шаирри шиирар, писателри романар кхьенва, композиторри манияр теснифнава, художникри зурба суьретар чIугунва. Халкьдин сивин яратмишунрани кIанивилиз гзаф кьадарда бейтер бахшнава. Лугьудайвал, ашукь хьайи гьар садакай шаирни жезвайди я. КIанивили инсан, лувар квачтIани, цавузни акъудзава, маса вахтунда дердерин, сефилвилерин сундухдани твазва. КIанивал вичихъ сергьятар авачир, инсан шад, бахтлу ийизвай, адан къуватар артухарзавай гьисс я.
Педагог, шаир, Голландияда яшамиш жезвай чи вах Гьуьлжагьан Мисрихановади вичи кIелай ктабрай туьш хьайи кIанивилиз талукь виш келима-фикир кIватIна ва чал агакьарнава. Чазни абур газетдин чинал гъун хъсан акуна.
- КIанивилихъай кичIе хьайидаз уьмуьрдихъайни кичIе жеда.
- КIанивал рикIин девлет я, гуналди генани гзаф жедай.
- КIанивал садрани туьхуьн тийидай са экв я.
- РикIе кIанивал авай инсандиз ам вуч ятIа хъсандиз чида.
- КIанивал — им са къугъун я къайдаяр авачир, гъалиб хьайи кас бахтлу ийидай.
- Са сеферда вуна гайи кIанивал вавай садрани къулухъ вахчуз жедач.
- Вуна рикIин кIанивилелди гайи савкьат садрани гъвечIиди жедайди туш.
( КьатI ама )
