И йикъара Мегьарамдхуьруьн райондин администрацияда райондин кьил Фарид Агьмедова инвесторар тир Леонард ва Омар Нагъиеврихъ галаз гуьруьш кьиле тухвана. Идакай «Лезги газетдиз» райондин администрациядин пресс-къуллугъди хабар гузва.

Алай вахтунда Москвада яшамиш жезвай, «Дорбостсервис» ООО-дин генеральный директор Леонард Нагъиев Мегьарамдхуьруьн Хъартас-Къазмайрин хуьряй я. Адаз вичин хайи хуьре алай аямдин спортдин майдан туькIуьриз кIанзава. Къейдзавайвал, арадал гъидай спортдин майдандихъ аялри ял ядай махсус гъвечIи майданни жеда. Гуьруьшдин сергьятра аваз, спортдин майдан арадал гъунин чилин участок хкягъунин, документар гьазурунин месэлайриз галай-галайвал килигна.

Адалайни гъейри, стхаяр тир Нагъиевар хайи хуьруьн мектеб ремонт авунизни куьмек гуз гьазур я. Хъартас-Къазмайрин хуьруьн кьил Омар Нагъиева малумарайвал, хуьруьн мектеб ремонт авуниз пулдин такьатар чара авунин фикир чпихъ фадлай авай.

Фарид Агьмедова къейд авурвал, алай девирдин истемишунрив кьазвай спортдин майданди жегьилриз спортдал машгъул хьунин, сагълам уьмуьр кьиле тухунин карда алава мумкинвилер гуда.

Гуьруьшдин эхирдай райондин кьил Ф.Агьмедова хайи хуьр абадуник  пай кутазвай Нагъиевриз чухсагъул малумарна.

Къейд ийин, спортдин хиле къазанмишай агалкьунриз, тухванвай мярекатриз килигна, 2018-йисан нетижайра Мегьарамдхуьруьн районди Дагъустан республикада 1-чка кьуна.

«Лезги газет»