Гьина аватIани, квел машгъул ятIани, гьар са касди вичин уьмуьр инсанвилелди, масабурузни чешне жедай жуьреда кьиле тухун важиблу я. Вич гьа и тегьерда тухузвай ватанэгьлийрикай сад алай вахтунда Саратовский областда спортдин рекьяй тренер яз кIвалахзавай кьурагьви  Эдгар  Вагьидович  Вагьидов  я.  

Э. Вагьидов 1992-йисан 14-августдиз Кьурагьрин хуьре дидедиз хьана. Гележегдин спортсмендин аял вахтар Саратовский областдин Ершовский райондин Рефоектор хуьре акъатна. Ина мектеб куьтягьай Эдгара 2010-йисуз тепловоздин машинистдин куьмекчи хьунин пешедай кIелна.  Гьа и йисан октябрдин вацра армиядин жергейриз эверай жегьил Екатеринбург шегьердиз акъатна. Буржи тамамарна хтайдалай кьулухъ ада вичин пешедай кIвалахун кьетIна. ИкI, 2012-йисуз Ершов шегьердин ТЧ-13 локомотивдин депода тепловоздин машинистдин куьмекчивиле  акъвазна. Гьа са вахтунда ада Саратовдин ДТШ-да вичин пешедин дережа хка­жунин макьсаддалди тепловоздин машиниствиле кIел хъувуна. 2014-йисан сентябрдалди вини­дихъ тIвар кьур депода кIвалах давамарна,  ида­лай кьулухъ икьрардин бинедаллаз Саратовда яракьлу кьушунра къуллугъна. Сержан­т­дин чин­да аваз, отделенидин командир хьайи ада къуллугъ вафалувилелди кьилиз акъудна.

Икьрардин муддат куьтягь хьайила, гъвечIи чIавалай спортдал рикI алай ватанэгьли бодибилдингдин ва фитнесдин залдин инструкторвал­ кIелун патал Москвадиз фена. Бен Вейдеран тIварунихъ галай машгьур колледж яру дипломдалди куьтягьна. Алай вахтунда спортдин “Максюта union” клубда тренер яз кIва­лах­зава.

2018-йисуз ада “Народный жим” дисциплина­дай WPU федерациядин спортдин устадвилин де­режа къачунин истемишунар тамамарна­. Бодибилдингдай хейлин акъажунра къазанмишнавай агалкьунар — гъалибвилер Эдгарахъ гзаф ава.

Адан гъилик 12-18 йисарин яшда авай 35-дав­ агакьна жегьилар спортдин и жуьредал маш­гъул я. Абурулайни гъейри, ватанэгьлиди чIе­хибурун дестедизни тренервалзава. Вичи кIва­­лахзавай спортдин мектебда, гьакI масанра­ни ада сагълам уьмуьрдин таблигъат тухузва.

Жегьилриз гьихьтин меслятар, насигьатар гуз жеда лагьайла, Эдгар Вагьидова икI лагьана: “Же­гьилри чпин вилик тайин макьсад эцигун­, гьар гьихьтин четинвилерал ацалтайтIани, гьа макьсаддив агакьарун лазим я. Гьелбетда, зун инал анжах спортдикай рахазвач. Хъсан къилих­рин, инсанвал авай юлдашрин юкьва хьун ва жув масабуруз чешне яз къалурун важиблу я. Гьина аваз хьайитIани, жув гьамиша халкьдин лайихлу­ хва хьиз тухун, лезги я лагьай тIвар рикIелай алуд тавун лазим я. Къуй жегьилар спортдиз мукь­ва ва тухузвай уьмуьрни сагъламди хьурай”.

Къуй чи къуватлу спортсмен Эдгарахъ мадни­ мягькем сагъламвал ва еке агалкьунар хьурай!

Куругъли Ферзалиев