Зи суьгьбет вич алай вахтунда лайихлу пенсияда авай, яргъал йисара Лезгийрин СтIал Сулейманан тIварунихъ галай муздрамтеатрда кIвалахай жумарт рикI авай Османов Герейханакай я.
АгъастIалви Середин Ватандин ЧIехи дяведин йисара акур азиятрик яргъалди азарлу хьана, рагьметдиз фена. Селимат гуьгъуьна кьуд аял аваз амукьна. Виридалайни чIехиди тир Герейхана дидедиз вичелай алакьдай вири куьмекар гудай. ЧIехи жезвай жегьил гададин рикI искусстводал гзаф алай. Мектебда кIелзамаз Герейхан шад вири мярекатрин иштиракчи тир.
«Чи хуьруьз Лезги театрдин коллектив тамашаяр гваз атайла, зазни, вири хуьруьнэгьлийриз хьиз, гзаф шад жедай. Зун театрдин актёрриз малаикриз хьиз килигдай, абуруз гьикI гьуьрмет ийидатIа, лугьуз фикиррик акатдай», — рикIел хкизва Герейхана.
Гьа икI, театрдал рикI алай жегьил гада 1967- йисуз Лезги театрдиз атана. Ада сифте сегьнедин рабочийвиле, ахпа машиниствиле кIвалахна. Пуд йисуз Советрин Армиядин жергейра кьегьалвилелди къуллугъна хтана. Театр рикIе гьатнавайвиляй адан гъиляй маса са кIвалахни къвезвачир. Герейхан театрдиз хтана. Ада ана саки 50 йисуз гьакъисагъвилелди къуллугъна, артистриз сегьнеда вири къулайвилер арадал гъиз алахъна, коллективдин патай гьуьрмет къазанмишна. Сегьнеда вичин асул везифаяр тамамарунилай гъейри, Герейхан театрда са шумуд тамашадани къугъвана: Б.Айдаева эцигай «Ашукь Гъариб» (Селим, 1977-йис), Э.Наврузбегован «Чинчрака” (Копьеносец, 1977-йис), «Скапенан кьуьруькар» (Къабачи, 1978-йис), А.Сайдумован «Ашукь Лукьман» (Ашукь, 1994-йис), М.Мирзабегован » Ашукь Саид» (Ашукь, 2012-йис) ва масабур.
ГъвечIи-чIехи чидай, гьамиша милайимдиз рахадай, зарафатрал рикI алай, къени къилихрин инсан яз, адаз халкьдин патай еке гьуьрмет ава. Алатай йисан эхирра Герейхан Серединовича вичин 70 йисан юбилей шад гьалара къейдна.
Гьуьрметлу Герейхан Серединович!
Лезги театрдин коллективди ваз лишанлу вакъиа рикIин сидкьидай мубаракзава, вахъ яргъи уьмуьр хьун алхишзава. Зи патай квез и цIарарни бахшзава:
Вун акьуллу, хъсан хесетрин са кас я,
Ви гьар са кар чIехи гьуьрметдиз хас я.
Ваз рикIивай лугьузва къе вирида:
«Играми дуст, ваз юбилей мубарак!»
Вун инсан я дуьзвилин рекьевай,
Нур я хьи вун ви багърийрин вилевай,
Гьавиляй ваз лугьузва чна рикIивай:
«Камаллу дуст, ваз юбилей мубарак!»
Эминат Загьирбегова
