Дагъустандин Докъузпара райондин Къурушрин хуьруьн мулкара авай Ярудагъда и мукьвара альпинизмдай Россиядин чемпионат кьиле фида.
Республикадин физический культурадин ва спортдин министерстводи хабар гузвайвал, акъажунар 2-февралдилай 16-февралдалди давам жеда.
Къейдзавайвал, чемпионатда чи уьлкведин жуьреба-жуьре регионрай вишдалайни гзаф спортсменри иштиракда.
Акъажунар кьиле тухун патал тешкиллувилин комитетни арадал гъанва. Къейдна кIанда хьи, и дережадин спортдин акъажунар Дагъустанда 2010-йисалай инихъ кьиле фенач.
Важиблу мярекатдиз гьазурвилер акунин гьакъиндай «Докъузпара район» МР-дин кьил Абдурагьим Алискерова вичин заместитель Салигь Гьажимурадовал, райондин культурадин управленидин начальник Беглер Бабаевал ва технический отделдин начальник Фазиль Сурхаевал са бязи тапшуругъар тапшурмишна.
«Лезги газет»
