РД-да авай ОПФР-ди хабар гузвайвал, 80 йисалай алатнавай пенсионеррин фиксированный (гьукуматди гьар вацра гун заминламишнавай тайин кьадар пул) пенсиядин кьадар кьве сеферда хкажнава.
ИкI, ведомстводи рикIел хкизвайвал, страховой пенсиядик кваз гьукуматди гьар вацра гун заминламишнавай пулунин тайин кьадар 2019-йисан 1-январдилай 5300 манатдал кьван хкажнава. 2019-йисуз страховой пенсиядик кваз и пулунин кьадарди 5334,2 манат ( шаз — 4983 манат) тешкилзава. Алай йисуз 80 йисалай алатнавай пенсионерриз гудай пул кьве сеферда хкажнава, яни адан кьадар 10668 манат хьанва.
РД-да авай ОПФР-ди къейдзавайвал, фиксированный пулунин кьадар кьве сеферда хкажун “Страховой пенсийрин гьакъиндай” 2013-йисуз кьабулай законда къалурнава. Дегишвилер яшариз килигна пенсия къачузвайбуруз талукь я. Иник яшайишдин, кьилел диде-буба аламачирвиляй гузвай ва 1-группадин инвалидвилин пенсия къачузвайбур акатзавач.
Пенсионеррихъ гелкъвезвай, чеб зегьметдиз къабил, амма кIвалахдик квачир гражданриз гьар вацра 1200 манат алава пул гун къалурнава. И кьадар пул пенсионердиз яшарилай аслу тушиз гузва. Ам гелкъвезвай касдиз гун патал тайинарзава. Идалайни гъейри, пенсионердиз куьмекзавай касдиз адахъ гелкъвезвай вахтунда страховой стаж гьисабзава ва гьар йисуз 1,8 балл гузва.
РФ-дин Президент В.Путина алатай йисан 3-октябрдиз пенсийрин къурулушда дегишвилер туниз талукь закондал къул чIугуна. ИкI, ана пенсиядиз экъечIдай вахт итимар патал — 65 ва дишегьлияр патални 60 йисалди хкажнавайди тайинарнава. 2018-йисуз юкьван гьисабдин пенсия 14100 манат тешкилзавай. Кьабулнавай закондал асаслу яз, 2019-йисуз, яшариз килигна, кIвалах тийизвай пенсионерриз гузвай пенсиядин кьадар 15400, 2024-йисузни 20 агъзур манатдив агакьда.
Гьазурайди — Рагнеда Рамалданова
