Сулейман-Стальский райондин администрациядин пресс-къуллугъди «Лезги газетдиз» хабар гузвайвал, къе, 2019-йисан 17-январдиз, райадминистрациядин къуллугъчияр администрациядин дараматдихъ галай мулкар герек тир къайдадиз хкун ва 80 кьван емишрин тарар авай багъдихъ гелкъуьн патал субботникдиз экъечIна.
Бигердин серенжем райондин кьил Нариман Абдулмуталибован теклифдалди, РД-дин кьил Владимир Васильеван «Къацу километрияр» акциядин сергьятра аваз, кьиле фена. Умумидаказ зегьмет чIугунин нетижада цIийи къелемар цадай чка гьазурна, емишрин тарарин кIанерик пер ктадна, абур талукь тир къайдада обрезка авуна, герек чкаяр киреждай асунна ва икI мад.
Райондин кьил Н.Абдулмуталибова къейд авурвал, райондин мулкар абадунилай гъейри, ихьтин мярекатри тешкилатрани идарайра кIвалахзавай коллективарни сад-садав агудзава.
«Лезги газет»
