Дагъустандин виридалайни хъсан пожарный часть хкягъунин конкурсда-килигуна “РД-дин цIаяр кьуникай хуьдай къуллугъ” ГКУ-дин регьбер Жаруллагь Малаеван приказдалди Докъузпара райондин 37-нумрадин пожарный часть 1-чкадиз лайихлу хьана.
Алатай йисан декабрдиз Махачкъалада Дагъустандин МЧС-дин пожарный частарин арада “РД — дин виридалайни хъсан пожарный часть ГКУ” тIвар къазанмишун патал конкурс-килигун кьиле фенай. Ана республикадин МЧС — дин пожарный вири частари, гьа гьисабдай яз Докъузпара райондин 37 — нумрадин частунини иштиракнай.
Конкурсдин макьсад цIаяр хкадарунал гьалтайла пожарный частарин гьазурлухвал ахтармишун, аварийриз талукь къутармишунин кIвалах кьиле тухун, зегьмет хуьнин хиле кIвалах хъсанарун ва къуллугъчийриз тIарвилер хьунин вилик пад кьун тир.
Конкурс-килигуна гъалиб хьайи Докъузпара райондин 37-нумрадин пожарный частунин командадив, винидихъ лагьанвайвал, Жаруллагь Малаеван приказдалди 1-дережадин диплом ва кубок вахкана. Къазанмишнавай агалкьунай Дагъустандин МЧС-дин министр Нариман Къазимегьамедова пожарный частунин начальник Мугьамед Магьадиноваз къуллугъдин рекье ишлемишун патал Нива-Урбан автомашиндин сертификат гана.
«Лезги газет»
