14-январдиз Махачкъаладин администрацияда РД-дин Гьукуматдин  Председателдин Сад лагьай заместитель Анатолий Къарибован регьбервилик кваз республикада санитариядинни эпидемиядиз акси гьалар ва ярар акатун чукIунин рехъ кьун патал кьиле тухузвай серенжемар веревирдна. Идан гьакъиндай РД-дин Кьилин ва Гьукуматдин Администрацидин пресс-къуллугъди хабар гана.

“РД-да авай гигиенадин ва эпидемиологиядин центр” ФБУЗ-дин кьилин духтурдин заместитель Айшат Гьажиевади малумарайвал, ярарик азарлу хьун республикада юкьван дережадилай алат­навай рекъемар Къумтуркъала, Леваша, Тарумовка, Сергокъала районра ва Избербаш шегьерда къейднава. Виридалайни гзаф азарлубурун кьадар  Махачкъала шегьердал гьалтзава — 59,3 процент. Адан гафаралди, региондин меркезда ярарик азарлу хьайи 157 дуьшуьш регистрация авунва.

“Азар акатнавай лишанар пайда хьайила, хъсандиз сагъар хъувун патал духтурдин патав фин лап важиблу я. Рапар ягъуниз талукь яз агьалийрихъ га­лаз гъавурдик кутунин кIвалах тухузва. Къейд авун лазим я хьи, азар гзаф кьадарра чукIуни пис нетижайрал гъун мумкин я. Ярари гзаф вахтара четин гьалар арадал гъида. И азар акатай инсанар стIалжем хьун, япар тIа, буьркьуь хьун, япариз зайифдиз ван атун, зигьиндиз зайиф хьун мумкин я”, — суьгьбетна Айшат Гьажиевади.

Роспотребнадзордин векилри совещанидин сергьятра аваз имунно-профилактикадин серенжемар тешкилуна, гьакI­ни регионда азардиз акси ва адан вилик пад кьунин серенжемар тухунин карда кимивилер амайдан гьакъиндай лагьана. Кьилди къачуртIа, неинки чеб-чпихъ галаз алакъада авай инсанрин арада вахт-вахтунда иммунизация тухун тийизвайди, гьакIни иммунизация тухунин  кIвалах зайифвайдини къейдна. Гражданар тади гьалда учетдиз къачунин, ра­пар ягъун планламишунин кардани кимивилер авайдакай лагьана.

Вичин нубатдай яз РД-дин здравоохраненидин министр Жамалуддин Гьажиибрагьимова къейдна хьи, имунниобиологиядин сагъар хъийидай дарманар санай масаниз тухунин ва хуьнин истемишунрал амал авуниз ихтибар тавуникди жегьил диде-бубайри гзаф  вахтара рапар ягъуникай кьил къакъудзава.

“Чун гьар са касдиз вири и крариз фи­кир гузвайди ва гуьзчивалзавайди къалуриз ва субутиз  гьазур я. Диде-бубайри аялдин патахъай жавабдарвал хивез къачун, къанажугълувал къалурун лазим я. РикIел хуьн важиблу я хьи, рапар ягъ тавунвай аялди  неинки са вичин сагъламвал, гьакIни патав гвайбурни къурхулувилик кутазва”, — малумарна ада. Эхирдай Анатолий Къарибова ара датIана профилактикадин серенжемар, ерилу малуматрин политика тухун, арадал атун мумкин тир чIуру нетижайрин гьакъиндай агьалийриз хабар гун теклифна.

“Рапар неинки са аялриз, гьакIни  гзаф инсанар авай чкайриз мукьвал-мукьвал къвезвай, активный уьмуьр кьиле тухузвай чIехибурузни ягъун лазим я”, — лагьана ада.

Совещанида РД-дин здравоохраненидин министр Жамалуддин Гьажиибрагьимова, региондин эцигунрин ва ЖКХ-дин министр Малик Баглиева, РД-да авай  муьштерийрин ихтиярар ва инсандин сагъ-саламатвал хуьнин рекьяй  гуьзчивал тухудай  федеральный управленидин къуллугъдин руководитель Элеонора Омариевади, Махачкъала шегьердин администрациядин кьилин заместитель Запир Алхасова, меркездин мэриядин къурулушдин подразделенийрин руководителри ва масабуру иштиракна.

«Лезги газет»