2018-йис чи уьлкведа волонтерринди тир. Жемиятдиз, ватандиз менфятлу крар чпин гуьгьуьлдалди тамамардайбур, ахьтин серенжемрик кьил кутадайбур вири девирра хьайиди я. Эхиримжи йисара ихьтин крарик иллаки гьерекат акатнава.
2018-йисан сентябрдилай, волонтеррин йисан сергьятра аваз, Кьурагь райондин Моллакент хуьруьн мектебдин муаллим Жульета Омаровади вичи тарс гузвай аялрикай ибарат волонтеррин “ЦIийи несил” десте арадал гъана. А чIавалай инихъ “ЦIийи несилди” хейлин мярекатар (кьилди къачуртIа, Етим Эминан 180 йисан юбилейдиз талукь яз адан шиирар кIелна, видеороликар арадал гъана, 9-11-классра кIелзавайбурухъ галаз “СПИД-дин вилик пад кьан” темадай суьгьбетар…) кьиле тухвана. Набутрин йикъаз талукьарна кьиле тухвай “Хъвер багъишин” серенжемдин сергьятра аваз хуьруьн набут аялриз савкьатар гана. РФ-дин Конституциядин йикъаз талукьарна, “Чна спорт хкязава” серенжем тешкилна.
Ихьтин мярекатрилай, серенжемрилай гъейри, волонтеррин дестеди ялгъуз хьанвай яшлу инсанризни куьмекар гузва. Дестедин планар мадни къалин я. “ЦIийи несилди” хайи чIал хуьниз талукь гьерекатрикни кьил кутазва. Баркалла чпиз!
Чи мухбир
