“Хъсанвал я цавай аватдач, я ам вич-вичелай чиляй экъечIдач”.
Къияс МЕЖИДОВ
Кьисмет, насиб. Ада инсандин уьмуьрдиз гуьзет тавур хьтин вакъиаяр гъида. Гьавиляй лугьузвачни: “Кьисметдихъай катиз жедач”. Хизандин жуьреба-жуьре гьалар себеб яз, гзаф лезгияр кьисметди къариблухриз акъуднава. Шад жедай кар ам я хьи, ахьтин ватанэгьлийрин арада агалкьунралди чпин кIвалахар кьилиз акъудзавай, бажарагъ авай, гьа са вахтунда халкьдикай, ватандикай фикирзавай, инсанпересвилинни ватанпересвилин чешне къалурзавай ксарни тIимил авач.
Ихьтинбурукай сад алай вахтунда Москвада яшамиш жезвай, эцигунрин материалар арадал гъизвай “ИксДом” компаниядин проектрин руководитель яз кIвалахзавай Земфира Къалабеговна Садыкъи я. Ам 1965-йисан 26-сентябрдиз Хив райондин Хъукьварин хуьре къуллугъчидин хизанда дидедиз хьана. Адан буба Къалабег Алиметовича гзаф йисара А.А. Тахо-Годидин тIварунихъ галай педагогикадин НИИ-да урус чIалан сектордин заведующий яз кIвалахна, диде Къияханум Къурбалиевнади хейлин йисара урус чIалан тарсар гана. Хизанда вад аял чIехи хьана. Вирида ДГУ тафаватлудаказ куьтягьна. Земфира Къалабеговна хизанда кьвед лагьай велед я. ЧIехи стха Аликбер Аликберов алай вахтунда РАН-дин Востоковеденидин институтдин директордин заместитель, Юкьван Азия, Кавказ ва Урало-Поволжья чирунин центрадин руководитель, CentraI-Eurasia.com информациядинни аналитикадин портал арадал гъайиди, РАН-дин эксперт я. Юкьван стха Алимет Къалабеговича компаниядиз регьбервал гузва. Гьар мумкинвал хьайила, ам хайи хуьруьз хквезва. Ана вичиз цIийи кIвални эцигнава. ГъвечIи стха Мурад Къалабегович компаниядин филиалрикай садан директор я. Дагъустанда Земфира Садыкъидин анжах вах (Гуьлнара) яшамиш жезва. Филологиядин илимрин кандидат тир ада Махачкъалада урус чIаланни литературадин тарсар гузва.
Земфира Садыкъиди ДГУ-дин филологиядин факультетдин урус ва Дагъустандин чIаларин отделение куьтягьна. Дагъустандай Москвадиз куьч хьун кьисмет хьайивиляй хкягъай пешедин (хайи чIалан муаллимвилин) рекьяй кIвалахдай мумкинвал хьанач. Амма муаллим яз ада Москвада кIвалахна. Уьмуьрдин юлдаш Раиф Садыкъидихъ галаз санал пуд веледдиз — са рушазни кьве хциз тербия гана. Руш Маринадини чIехи хва Арсена экономиствилин пеше къачунва. ГъвечIи хва Максим Бауманан тIварунихъ галай МГТУ-дин студент я. Марина Садыкъиди 3 йисуз Дагъустандин Гьукуматдин Председателдин меслятчи яз кIвалахна. Алай вахтунда Россиядин Минпромторгда отделдин начальник я. Арсен маркетолог я, ада 11 йис идалай вилик тешкилай хизандин компанияда кIвалахзава. А компания эцигунринни алишверишдин крарал машгъул я; тешкилатди эцигунрин кIвалахра ишлемишдай хсуси материалар арадал гъизва.
Земфира Садыкъидин хизан милливал хуьзвай, хайи чIалан, эдебиятдин къайгъу чIугвазвай ватанперес хизан я. Гаф кватай чкадал къейд ийин, Земфирадин уьмуьрдин юлдаш Раиф Садыкъи машгьур алим, шаир Мегьамед-Гъалиб Муьгьуьдинович Садыкъидин стхадин хва я.
“Москвадин лезгияр” общественный тешкилатдин активист яз, абурун хва Арсен Садыкъи общественный кIвалахрални машгъул жезва, гегьенш къатариз раижзавачтIани, дарда авай инсанриз, азарлубуруз алакьдай куьмекар гузва.
Гьар йисуз Москвада Яран сувариз талукь мярекатар тешкилунилай гъейри, Садыкъийрин хизанди Москвадин миллетрин кIвале цIудалайни гзаф милли мярекатар, гуьруьшар тухвана. Дагъустандайни мугьманриз теклифуналди, Москвада СтIал Сулейманаз, Етим Эминан 180 йисан юбилейдиз, Етим Эминан яратмишунар ахтармишай алим Гъалиб Садыкъидин 100 йисан, Асеф Мегьманан юбилейриз бахшнавай милли мярекатар, алай аямдин тIвар-ван авай шаир Седакъет Керимовадин шииратдин межлис ва масабур кьиле тухвана.
“Зи диде Къияханум Къурбалиевна зегьметдин ветеран я. Адан ученикри гьамиша разивилин чарар кхьизва. Зи пуд стхани Москвада яшамиш жезва. ГъвечIи ватандиз гьар йисуз хъфизватIани, ина ахварайни чаз хайи ерияр аквазва”, — лугьузва Земфира Къалабеговнади.
Къуй чи ватанэгьлийрихъ, гьина аватIани, чандин сагъвал, кIвалахда мадни агалкьунар хьурай!
Куругъли Ферзалиев
