МРОТ-дин кьадар артухарда
Россиядин Президент В.Путина гьар йисуз зегьметдин гьакъидин агъа кIанин кьадар (МРОТ) артухарунин гьакъиндай закондин къарардал къул чIугуна. Адал асаслу яз, МРОТ-дин кьадар юкьван гьисабдалди 117 манатдин артухарда. Идан гьакъиндай “RT” телеканалдин сайтди хабар гузва.
Октябрдин вацра гьар йисуз зегьметдин гьакъидин агъа кIанин кьадар хкажунин, ам яшамиш хьуниз лазим агъа кIанин дережадив кьван агакьарунин гьакъиндай Госдумади законопроект кьабулнай.
ИкI, 2019-йисуз 117 манатдин артух хъувуникди МРОТ-дин кьадарди 11280 манат тешкилда. Идалай вилик МРОТ-дин кьадар 2018-йисан майдиз 11163 манатдив агакьдайвал хкаж хъувунай.
Уьлкведин итижар патал
Россиядин премьер-министр Дмитрий Медведева Украинадиз талукь санкцияр гегьеншарунин гьакъиндай къарардал къул чIугунвайдакай «Twitter» соцсетда малумарна. “И кар чи государстводин, тешкилатрин ва ватандашрин итижар хуьн патал авунва”, — кхьена Д. Медведева.
Гьукуматдин пресс-къуллугъди хабар гузвайвал, санкцийрин сиягьдик 200-далайни гзаф ксар ва тешкилатар акат хъувунва.
22-октябрдиз РФ-дин Президент В.Путина Украинадиз талукь яз экономикадин жигьетдай махсус серенжемар кьабулунин гьакъиндай къарар акъуднай. Санкцийрин сиягь гьазурун министррал тапшурмишнай. Нетижада а сиягьдик 322 украинвини 68 тешкилат акатна.
Августдин вацра Киевди Крымдин муьгъ эцигунихъ галаз алакъалу месэла меземмет авуна ва Россиядиз акси са жерге санкцияр малумарна.
Сириядиз куьмек гудалда
Саудовский Аравия Сирия гуьнгуьна хтунин кардиз пулдин такьатар чара ийиз гьазур я. Идан гьакъиндай США-дин президент Д.Трампа вичин “Twitter” аккаунтда малумарна.
Адан гафарай, Саудовский Аравияди Сириядиз куьмек гуз гьазурвал къалурна. Трампа ихьтин кам къачунай арабрин уьлкведиз чухсагъулни малумарна.
“Аквазвани? Яргъа авай США-ди ваъ, гзаф девлетлу уьлквейри чпин къуншийриз гуьнгуьна хтунин карда куьмек гун тебрикдай кар тушни мегер!”, — кхьенва Д.Трампа.
19-декабрдиз раижайвал, США-ди Сириядай чпин аскерар ахкъудиз башламишна. Кьушунар ахкъудунин гьерекатар 60-100 юкъуз давам жедайдакай лагьана.
Сирияда граждан дяве 2011-йисалай давам жезва. 2015-йисан зулалай Сириядин гьукуматдин тIалабуналди Россияди адаз террористар терг авунин карда куьмекзава. Ягъунар, Дамаскдивай ихтияр къачун тавуна, 2014-йисалай США кьиле авай международный коалициядини кьазва.
Крокодилри гьужумзава
ЮАР-да (Африка) вацIун къерехда парталар чуьхуьзвай аялдал садлагьана крокодилди гьужумна. Идакай “eNews ChanneI Afri” чешмеди хабар гузва.
Туькьуьл агьвалат Лимпопо вилаятдин Тхохояндоу шегьердин мукьув 22-декабрдиз арадал атана. Полициядин делилралди, гада эхиримжи сеферда вацIун патав акунай. Ада вичин дустарихъ галаз вацIун банд алай чкадал парталар чуьхуьзвай. И участок гьамиша крокодилри гьужумзавайди ятIани, инсанри игьтият хуьзвач. Бейхабардиз цяй экъечIай крокодилрикай сада аял легьзейрин къене тухвана.
Арадал атай чIуру агьвалатдикай полициядин къуллугъчийриз пакадин юкъуз чир хьана ва гададихъ къекъвез башламишна. МичIини хьана, амма къутармишунин дестедин гьерекатри са нетижани ганач. Пакадин юкъуз жагъурунин серенжемар мадни давамарна. Эхирни аялдин кьилел атай дуьшуьш дуьздал акъудна.
Полициядин къуллугъчийри диде-бубайриз чпин аялар гуьзчивиликай хкуд тавун, абур вацIун патарив ахъай тавун меслятна. Къейдзавайвал, эхиримжи вахтара крокодилри инсанрал гьужумунин дуьшуьшар артух хьанва.
Нетижаяр кьуна
Россиядин МИД-ди 2018-йисуз США-дихъ галаз хьайи алакъайрин нетижаяр кьуна. Идакай РБК-диз РФ-дин къецепатан крарин министрдин заместитель Сергей Рябкова малумарна.
Адан гафарай, “тарифдай хьтин са затIни авач”. Терроризмдихъ галаз женг чIугунин карда са фикирдал атун, финансрин, энергетикадин министерствойрихъ галаз хъсан алакъаяр хуьн – МИД-дин векилди анжах гьа и месэлаяр агалкьунар яз гьисабна. Гьа са вахтунда, Рябкова къейд авурвал, Международный космический станцийрин барадайни кIвалахар санал тамамарун давамарзава.
“Санлай къачурла, алакъайрин жигьетдай вилик финин крар тIимил я”, — нетижа кьуна дипломатди. Москвадинни Вашингтондин арада туькIвей алакъаяр авач. Кьве терефдини гьялна кIанзавай месэлайрин кьадар гзаф я.
Гьазурайди — Куругъли Ферзалиев
