Къенин чи ихтилат Ярославлда яшамиш жезвай чи ватанперес векилдикай – ЯЛНКА тешкилатдин, “Термоклимат” туьквенрин регьбер, карчи, Ярославль шегьердин общественный палатадин член Гьасанов Васиф Абдулбеговичакай я.
Васиф Гьасанов 1971-йисан 23-январдиз КцIар райондин ЧIакIарин Паласа хуьре агрономдин хизанда дидедиз хьана. 1986-йисуз муьжуьд йисан мектеб куьтягьайдалай кьулухъ Волгограддин эцигунрин техникумдин ПГС-дин (промышленный ва гражданский эцигунрин) отделенидик экечIна. Техникум куьтягьайдалай кьулухъ 1990-1992-йисара армиядин жергейра къуллугъна.
1992-йисуз Ярославль шегьердиз куьч хьана ва ЖБК-2 стройгруппада устIар яз кIвалахиз эгечIна. 1993-йисуз Васиф Гьасанов Вирироссиядин финансринни экономикадин институтдин менеджментдин факультетдик экечIна. КIелунихъ галаз сад хьиз, ватанэгьлиди вичин “Термоклимат” ООО-дин тешкилат ачухна, эцигунрин хиле инженервилин кIвалахарни кьилиз акъудна.
Гьар са рекьяй чирвилер къачун важиблу кар яз гьисабзавай Васиф Гьасанова мад са вуз куьтягьун кьетIна. ИкI, 1999-йисуз ам Москвадин экономикадин, статистикадин ва информатикадин университетдин юриспруденциядин факультетдик экечIна.
2005-йисалай Васиф Гьасанов общественный кIвалахрал машгъул я. 2009-йисуз ам ватанэгьлийрин рейсад къарардалди ЯЛНКА-дин (Ярославлдин лезгийрин милли культурадин автономия) регьебрвиле хкяна. 2010-йисуз Васиф Гьасанован теклифдалди Тутаевский лезгийрин милли культурадин атономияни регистрация авуна.
2009-йисуз ЯЛНКА-дин къвалав Кавказдин кьуьлерин “Ритмы гор” ансамбль арадал гъана. И ансамблди неинки лезги тешкилатдин, гьакI Россиядин халкьарин Ассамблеядин Ярославлдин отделенидин мярекатрани иштиракзава, шегьердин ва региондин вири суваррик алакьунар къалурзава.
2014-йисуз В.Гьасанован ва ЯЛНКА-дин векилрин къаюмвилик кваз СтIал Сулейманан 145 йисан юбилейдин сергьятра аваз шаирдин урус чIалаз таржума авунвай шииррин “ЦIийи таржумаяр” кIватIал чапдай акъудна. Ктабдин презентацияр Ярославлдин мэриядин залда, Москвада миллетрин кIвале ва Дагъустандин писателрин Союзда кьиле фена.
В.Гьасанован регьбервилик кваз лезги культурадин тешкилатди, гьа арадал атай йисалай эгечIна, неинки милли, гьакI шегьердин, гьукуматдин, диндин суварриз, спортдиз талукьарнавай метлеблу самбар мярекатар тухванва.
Футболдин “Садвал” командадини 2007-йисалай жуьреба-жуьре акъажунра агалкьунралди иштиракзава.
Лезги тешкилатди 2011-йисуз арадал гъайи “Ярославский областдин азаддиз кьуршахар кьунин федерацияди” вичин кIвалах хъсан нетижайралди давамарзава.
Халкьдин къайгъуда авай, милливал хуьз алахъзавай ватанэгьлиди шегьерда авай жегьил лезгийриз хайи чlал чирун патал 2017-йисуз Ярославлда лезги чIалан мектебни ачухна.
Ярославский областдин общественный палатади 2014, 2015, 2016-йисара лезгийрин милли тешкилат (ЯРЛНКА) и областда “Ватандашвилин агалкьунар” номинациядай жемиятдин лап хъсан тешкилат яз гьисабна.
2015-йисуз шегьердин мэрдин теклифдалди Васиф Гьасанов сифте яз Ярославль шегьердин общественный палатадин векилвиле хкяна, 2018-йисуз мад сеферда хкя хъувуна. Гьа са вахтунда 2015-йисалай ам Россиядин халкьарин Ассамблеядин Ярославлдин отделенидин руководителдин заместитель я.
ДатIана жемиятдин кIвалахрал машгъул ятIани, “Термоклимат” туьквенрин сеть кардик кутуналди, чи ватанэгьлиди вичин карчивилин кIвалахни агалкьунралди давамарзава.
Къуй адахъ ва ам кьиле авай милли тешкилатдихъ мадни зурба агалкьунар хьурай!
Куругъли Ферзалиев
