Аллагьди лагьана: “Регьимлувиляй абуруз куь муьтIуьгъвал къалура ва лагь: “Я Рабби, регьим ая абуруз, гьикI абуру регьимдалди зун гъвечIи чIавуз хвенатIа!” (“АтI-ТIарикъ”, 24).

Абу Абд ар-Рагьман Абдуллагь бин Масуда лагьана: “Садра за Пайгъамбардивай (с.а.с.) хабар кьуна: “Аллагьдиз виридалайни гьи кар кIан я? Ада лагьана: “Вахтунда авур капI”. За хабар кьуна: “Адалай кьулухъ?” Ада лагьана: “Диде-бубадиз гьуьрмет авун”. За хабар кьуна: “Адалай кьулухъ?” Ада лагьана: “Аллагьдин рекье женг чIугун”. (Аль-Бухари, Муслим).

Абу Гьурайради агакьарайвал, Аллагьдин Расулди (с.а.с.) лагьана: “Къуй Аллагьдихъ ва Къияматдин йикъахъ инанмиш жезвай касди мугьман хъсандиз кьабулрай ва къуй Аллагьдихъ ва Къияматдин йикъахъ инанмиш касди хъсан гафар лугьурай ва я чуькьни тавуна акъвазрай” (Аль-Бухари, Муслим).

Абу Гьурайради лагьана: “Садра Пайгъамбардин (с.а.с.) патав са кас атана ва хабар кьуна: “Я Аллагьдин Расул (с.а.с.), инсанрикай  хъсан рафтарвал авуниз виридалайни вуж лайихлу я?” Ада лагьана: “Ви диде”. А касди хабар кьуна: “Ахпа — вуж?” Ада лагьана: “Ви диде”. А касди мад хабар кьуна:  “Ахпа — вуж?” А чIавуз ада лагьана: “Ви буба” (Аль-Бухари,  Муслим).

Муслима гъанвай гьадисдин жуьреда лугьузвайвал, а касди хабар кьуна: “Я Аллагьдин Расул, инсанрикай хъсан рафтарвал  авуниз виридалайни вуж лайихлу я?” Пайгъамбарди лагьана: “Ви диде, ахпа ви диде, ахпа ви буба, ахпа ви лап мукьвабур”.

«Ас-салам» газетдай