2018-йисуз спортда къазанмишнавай агалкьунриз килигна, “Лезги газетдин” редакцияди лезгийрикай виридалайни хъсан 10 спортсмен яз хкянава:
Сир туш, “Лезги газетдин” редакцияди спортда къазанмишнавай агалкьунриз килигна, лезгийрикай виридалайни хъсан нетижаяр къазанмишнавай 10 спортсмен хкягъун адетдиз элкъвена гзаф йисар я. Шаз чи уьлкведин ва дуьньядин жуьреба-жуьре пипIера чи ватандашри, спортдин еке кукIушар муьтIуьгъаруналди, чун шадарна. Винидихъ тIварар кьунвай спортсменри — иллаки. Абурукай чна гъиле-гъилди хабарарни муштулухар ганай. Яргъара, чаз хабар авачиз, чи халкьдин векилрикай спортдин виниз тир кукIушриз хкаж хьанвай спортсменар мадни аватIа, тIалабзава гележегда редакциядихъ галаз алакъа хуьн, чпикай хабар гун. Чун и кардал анжах шад жеда. Лезги халкьдин тIвар гьуьндуьр дережайриз хкажзавай вири кьегьалриз аферин, баркалла! Эхь, ахьтин кьегьал рухваярни рушар лезги гьар са райондин векилрин арада ава. Чна квелди дамахзава. Куьн чи миллетдин кьилин винизвал я…
Алатайди спортдин кьилин дережадин акъажунар-Олимпиада, Исламиада, Европадин къугъунар кьиле тухузвай йис туширтIани, дуьньядин майданрал акъажунар, викIегьбур хкягъун патал бягьсер гзаф кьиле фена. ИкI, чи ватандаш Гьажи Наврузов Таиланддин меркез Бангкок шегьерда боксдай кьиле фейи дуьньядин чемпионатда (ярумчух финалда — Бразилиядай, финалдани Украинадай тир 5 сеферда дуьньядин чемпионвилин тIвар къачунвай боксёр гъутарин харцик кутуналди) 91 кг — дин заланвал авай спортсменрин арада къизилдин медалдиз лайихлу хьана.
31 — мартдиз Москвада женгинин искусствойрин центрада гьам итимрин, гьамни дишегьлийрин арада кекусин-кан каратэдай (кумитэ ва ката жуьрейрай) Россиядин XIV чемпионат кьиле фена. Кьурагь райондин Хпежрин хуьряй тир, алай вахтунда Москвада яшамиш жезвай РагъэкъечIдай патан единоборствойрай секциядин тренер Шамил Рамазанова (80 кг) ина 1 — чка кьуна.
2018-йисуз Калининградда азаддаказ кьуршахар кьунай ветеранрин арада XIX международный турнирда Къариб Ашуралиева 1-чка кьуна. Идалайни гъейри, азаддаказ кьуршахар кьунай спортдин ветеран, кьве сеферда дуьньядин ва Европадин чемпионатрин гимишдин призёр тир чи ватандашди алатай йисан июлдиз Смоленск шегьердин “Юбилейный” спортдин дворецда ветеранрин арада кьиле фейи Россиядин ачух чемпионатдани 70 кг — дин заланвал авай спортсменрин арада къизилдин медаль къазанмишна. Гила ам 5 сеферда Россиядин чемпионвилин тIварцIиз лайихлу хьанва. Лугьун лазим я хьи, лезги халкьдин векилар тир спортдин ветеранрин арада Къариб Ашуралиев ихьтин гьуьндуьр дережадиз хкаж хьанвай сифте пагьливан я. Ингье чи жегьилриз хъсан чешне. Агъадихъ галай жегьил пагьливанрин агалкьунри а чешнедиз лайихлу рухваярни рушар авайди тестикьарзава. Чак руьгь кутазва. 2018 — йисан апрелдиз Кьурагьрин хуьряй тир, алай вахтунда Дербентда ДГУ-дин филиалда кIелзавай Азиз Юсупова Москвада пауэрлифтингдай (къуватдин троеборье) кьиле фейи Европадин чемпионатда кьве номинациядай (штанга хкажунай) чемпионвилин тIвар къазанмишна. Октябрдиз спортдин и жуьредай Москвада кьиле фейи дуьньядин чемпионатдани чи ватандаш кьве номинациядай 1 — чкайриз лайихлу хьана, дуьньядин чемпионвилин тIвар къазанмишна.
Вичин ери-бине Ахцегьай тир Карина Палчаевадин устадвилини чун шадарна. Кьезил атлетикадай РД-дин хкянавай командадик кваз Ахцегь райондин 2 — нумрадин ДЮСШ-да вердишвилер (тренер — Абдурагьим Палчаев) къачузвай ада 2001-2003-йисара дидедиз хьанвай рушарин арада Россиядин кIвенкIвечивал патал акъажунра, 100 метрдиз 50,18 секундда чукуруналди, неинки 1 — чка кьуна, гьакI республикадин рекордни эцигна. Лугьун лазим я хьи, и рекорд 1980-йисалай инихъ цIийи хъувунвачир. Идалайни гъейри, Карина и турнирда 200 метрдин мензилдиз чукурунайни тафаватлу хьана.
Алатай йисуз вичин агалкьунралди чун шадарай ксарин арада ери-бине Сулейман-Стальский райондин Алидхуьрелай тир Аслан Къурбановни ава. Калужский областдин Медынь шегьерда универсальный бягьсерай (лайт) Европадин чемпионатда ада къизилдин медаль къазанмишна. Гуьгъуьнлай гьа ина кьиле фейи дуьньядин чемпионатдани чи ватандаш къизилдин медалдиз лайихлу хьана. Гила ада спортдин и жуьредай 4 сеферда дуьньядин чемпионвилин тIвар къазанмишнава. Ам гьакIни самбодай дуьньядин Супер Кубокдин (2017 – йис) — сагьиб, дзюдодайни самбодай спортдин мастер я.
Пешекарри къейдзавайвал, азаддаказ кьуршахар кьунай гележег авай спортсменрикай сад Даурен Куругълиев я. Кесерлу хейлин акъажунра (Буйнакский райондин Буглен хуьре гьар йисуз РД-дин Халкьдин Собранидин Председатель Х.Шихсаидован призар патал тухузвай турнир, Иван Ярыгинан Гран-При …) гъалибвилер къазанмишна. 2018 — йисуз азаддаказ кьуршахар кьунай Московский областдин Одинцово шегьерда кьиле фейи Россиядин чемпионатда ада 86 кг-дин заланвал авай спортсменрин арада инанмишвилелди 1-чка кьуна.
2018-йисуз Россиядин чемпионвилин тIвар къазанмишай спортсменрин арада Докъузпара райондин ДЮСШ — дин какахьай женгерай тренер, жуьреба-жуьре акъажунрин гъалибчи Артур Алискеровни ава. Ада Ленинградский областдин Колпино шегьерда спортдин и жуьредай кьиле фейи акъажунра 1-чка кьуна.
Алатай йисуз залан атлетикадай Россиядин чемпионат Дондал алай Ростов шегьерда кьиле фенай. Ана 69 кг- дал къведалди заланвал авай спортсменрин арада Феликс Халибегова Россиядин чемпионвилин тIвар къазанмишна. Санлай къачурла, ада и турнирда 305 (140 + 165) кг заланвал авай штанга хкажна. Спортдин и жуьредай пешекарри адак еке умудар кутазва.
Са тIимил вахт инлай вилик Туьркиядин Анталья шегьердай чав шад хабар агакьнай. Армреслингдай 4000-далай виниз спортсменри чпин гъилерин къуватар алцумай дуьньядин чемпионатда Россиядин хкянавай командадик кваз вичин ери-бине Сулейман-Стальский райондин ЦIийи Макьарилай тир Агьмед Къурбанова 75 кг-дин заланвал авай спортсменрин арада къизилдин медаль, Кубок ва сертификат къазанмишна. Ада вичихъ галаз бягьсиниз экъечIай 4 спортсмендин гъилерни регьятдаказ кIаник кутуна. А.Къурбанова армреслингдай дуьньядин чемпион, РФ-дин лайихлу тренер Малик Тагьирбегован гъилик вичин устадвал хкажзава.
Спортдин гьи жуьре хьайитIани, агалкьунар ва гъалибвилер къазанмишиз регьят кар туш. Хъсан нетижаяр хьун патал спортсменри датIана зегьмет чIугуна, гьар йикъан тренировкайра гьекьер авадарна, пешекар — тренеррин истемишунар кьилиз акъудна кIанзава. Гьуьрметлу спортсменар, тренерар! “Лезги газетдин” редакциядин коллективдиз ЦIийи йисуз квехъ чандин мягькем сагъвал, рикIин шадвал, спортдин мадни еке кукIушриз хкаж жедай къуватар артух хьана кIанзава. Гъалибвилерихъ — виликди!
Рагнеда Рамалданова
