Дуьньядин халкьари, гьа жергедай яз лезгийрини, машгьур ксарин: камалэгьлийрин, писателрин, шаиррин, алимрин, регьберрин камаллу келимайрикай, афоризмайрикай менфят къачузва. Амма чна чи лезги писателрин эсерра дуьшуьш жезвай камаллу, менфятлу, насигьатлу, маракьлу келимайриз-афоризмайриз саки фикир гузвач. Са мус ятIани, са ни ятIани кхьей дерин манадин гафар, вахтар алатайла, афоризмайриз элкъвезва. Са шакни алачиз, чеб арадал гъайи девирдилай аслу тушиз, ахьтин гьар са келимадин метлеб са девирдани квахьдач.

Лезги афоризмайрин алемдихъ галаз газет кIелзавайбур танишарунин макьсаддалди, чна “Камал. Менфят. Ибрет” тIвар алай цIийи рубрика кардик кутазва.

“Сир чуьнуьхиз кIанда бязи алимриз,

БалкIандиз хьиз галтIам ягъиз илимдиз”.

(Алкьвадар ГЬАСАН).

“Ватан, хайи чIал гьисаба авачир касдиз анжах манкъурт лугьуз жеда”.

(Гьажи ГАШАРОВ).

“ГъалатI садра, къехуьн жеда гьамиша”.

(Мурсал АЛПАН).

“Кьиле бажарагъдикай магьрум тир инсанар авай культурадин маканра бажарагълу инсанриз чка авайди туш”.

(Азиз МИРЗЕБЕГОВ).

“Инсан илимлуди хьуниз ктабди рехъ ачухзава”.

(Тажидин АГЬМЕДХАНОВ).

“Гъилевайди тIимил акваз, масадан шей мийир тараш”.

(Етим ЭМИН).

“ЯхцIур йисуз ичин цуьк ахъаяй тарци яхцIурни сад лагьай йисуз мулдин цуьквер гъидач”.

(Агьед АГЪАЕВ).

“Чин чIур мийир, эй бейниван,

Чирна рахух тахсир жуван”.

(Хуьруьг ТАГЬИР).

“Дустарин тариф авун кьулухъ тур вуна,

Гьахъ гъиле яхъ, гьадахъ далу акала”.

(Мазали АЛИ).

“ДатIана вирт кIватIа жуван Ватандиз,

Ваз вирт гузвай цуьквер пузмиш тавуна”.

(Шихнесир КЪАФЛАНОВ).

КIватIайди – Куругъли Къалажухви