Россиядин илимдин ва высший образованидин министерстводи  кIелунин 2018-2019-йисуз  РФ-дин Президентдин стипендияр къачун патал малумарнавай  конкурсдин нетижаяр кьуна, хабар гузва Дагъустандин государстводин технический университетдин пресс-къуллугъди.

РФ-дин илимдин ва высший образованидин министерстводин къарардалди, Россиядин Президентдин  стипендия ДГТУ-дин пуд студентдиз тайинарнава. ИкI, и стипендиядин сагьибар 5-курсунин студентар Рагьимат Алиева ва Муслим Гьажиагьмедов, гьакIни 4-курсуна кIелзавай Маликат Омарова хьанва.

Вуздин руководстводи ва профессорринни муаллимрин коллективди кьиле тухузвай кIвалахдин, абуру  студентар дерин чирвилер ва  алакьунар аваз гьазурун патал ийизвай чалишмишвилерин нетижада  къе ДГТУ-дин  студентрикай вини дережадин  стипендийрин сагьибар хьанва.

Университетдин  векилри къачузвай и ва я маса касдин тIварцIихъ яна гузвай стипендийрин арада РФ-дин Президентдин стипендияди  кьетIен чка кьазва. Ам Россиядин экономика алай аямдин истемишунриз жаваб гудайвал  туькIуьрунихъ галаз алакъалу кар алай ва технологийрин рекьерай  чирвилер къачузвай студентриз гузва.

“Вини дережадин стипендияр тайинарун патал  чи студентар, вилик эцигнавай вири истемишунриз жаваб гун себеб яз,  амайбурун арадай хкяна.  Абурухъ неинки виликамаз тухвай аттестацийрин нетижайрай  “лап хъсан”  ва “хъсан” къиметар ава,  гьакIни  гзаф кьадар олимпиадайрин,  конкурсрин гъалибчияр  ва пишкешар къачур ксар я, абуру  илимдинни ахтармишунрин кIвалахрин нетижайрай наградаяр къачунва,  илимдин изданийра  макъалаяр чапнава. И студентар гьакIни вузда,  вири Россиядин сергьятра кьиле тухвай ва международный  конференцийрал, симпозиумрал  докладар авур, активнидаказ иштиракай ксар я”, — къейдзава вуздай тир чешмеди.

Чи мухбир