Декабрдин эхиррай Белиж поселокдин аялринни жаванрин яратмишунрин кlвале Дербент райондин кьиблепатан зонадин школайра алава образованидин хиле чирвилер къачузвайбурун арада Россиядин алава образованидин 100 йис тамам хьуниз талукьарнавай “Чна бажарагълубур жагъурзава” конкурс кьиле фена.
Белиж поселокдин аялринни жаванрин яратмишунрин кlвал кардик кваз 40 йисалай гзаф я. Ина художественный ва эстетикадин 9 тешкилат кардик ква. Алатнавай йисара ана гзаф аялриз гьар жуьредин пешейрай чирвилер гана ва гузва. Тежриба авай муаллимрин гъилик чирвилер къачузвай аялри гьар йисуз гьам районда, гьам республикада ва Россиядин регионра тухузвай конкурсра, фестивалра иштиракзава ва кlвенкlвечи чкаяр кьазва.
Конкурсдин кьилин макьсад милли ва эстрададин манияр лугьудай манидаррин сиягь гегьеншарун, и рекьиз бажарагълу жегьил гьевескарар желб авун ва ашкъиламишун я. Ана 15 школада алава образованидин хиле чирвилер къачузвай 29 касди иштиракна.
Мярекатда аялрилай гъейри муаллимри, диде-бубайри, райондин образованидин методистар Залина Казимовади, Светлана Алирзаевади, Мелик Агъабалаева, и цlарарин авторди ва масабуру иштиракна.
Конкурс тешкиллудаказ кьиле фена. Жаван гьевескарри чпихъ жанлу сесиналди мани лугьудай алакьунар авайди тестикьарна. Ана тамамарай саки вири манияр тамашачийри хушдиз кьабулна. Вад касдикай ибарат жюриди, гьар са гьевескардин алакьунриз килигна, къвезвай къимет гана.
Гьа икl, конкурсда сад лагьай чкадиз 72 балл къазанмишай Белиждин Г. Лезгинцеван тlварунихъ галай школа ва Хазардин СОШ лайихлу хьана. Кьвед лагьай чкаяр — Белиж хуьруьн ва Нуьгдидин юкьван школайри, пуд лагьай чкаярни Рубасдин, Белиж поселокдин сад ва кьвед лагьай нумрайрин юкьван школайри кьуна.
Жюриди гьам михьи сесиналди лугьунай, гьам сегьнедин гьунаррай ва гьамни кьадайвал алукlнавай либасрай Эмина Рамазановадин, Мензе Гьусейновадин, Саида Алиевадин, Нарунж Къарибовадин, Эмина Рамазановадин, Шавле Гьажиевадин, Алена Ибрагьимовадин алакьунар къейдна. Гъалиб хьайи ва приздин чкаяр кьур школайрив, хъсан алакьунар къалурай жаван артистрив райондин образованидин управленидин патай грамотаяр ва дипломар вахкана.
Нетижаяр кьур жюридин председатель Залина Казимовади конкурс вини дережада аваз тешкилна кьиле тухвай аялринни жаванрин яратмишунрин кlвалин директор Мамедали Агъабалаеваз, вири иштиракчийриз чухсагъул малумарна, милли искусство раижзавай ихьтин мярекатар тухун тариф авуниз лайихлу тирди къейдна. “Вучиз лагьайтlа, абуру чи руьгь хкажзава, манидарвилин искусство раижзава, чи халкьдин хазина хуьзва, акьалтзавай несилдиз милли манияр кlанарзава, — лагьана ада”.
Къагьриман Ибрагьимов
