ЦIийи йисан вилик квай йикъара чав шад хабар агакьна. Дагъустандин Кьил Владимир Васильеван 2018-йисан 31-октябрдин Указдалди медицинадин рекье 46 йисан стаж авай чи ватандаш — алай вахтунда Дагъустандин МВД-дин медсанчастуна зегьмет чIугвазвай Абдулаева Тамал Мирзоевнадиз “Дагъустан Республикадин лайихлу духтур” лагьай гьуьрметдин тIвар ганва…
Тамал Абдулаева 1948-йисуз Сулейман-Стальский райондин Вини СтIалдал дидедиз хьана. 1966-йисуз Кьасумхуьруьн юкьван школа гимишдин медалдалди акьалтIарна. Гьа и йисуз жегьил руш Дагъустандин медицинадин институтдин лечебный факультетдиз гьахьна. Анаг акьалтIарай 1972-йисалай Тамал Мирзоевнади духтур- офтальмолог яз зегьмет чIугвазва.
Духтурди Ростовда, Запорожьеда, Махачкъалада кардик квай “Высокие технологии” клиникада, Дагъустандин вилерин микрохирургиядин центрада вичин пешекарвал хкажна. Алатай йисара ада Кьасумхуьрел райондин больницада, Дербентда, Махачкъалада, 1998-йисан январдилай инихъ ада, винидихъ къейднавайвал, РД-дин МВД-дин медсанчастуна зегьмет чIугвазва. Кьилин категориядин духтурдиз азарлуйрин ва кIвалахдин рекьяй юлдашрин арада еке гьуьрмет ава.
Алай йисан 9-ноябрдиз, Полициядин йикъаз талукь яз, Махачкъалада, Дуствилин КIвале, кьиле фейи шад мярекатдал гьукуматдин награда-Дагъустандин лайихлу духтурвилин шагьадатнама Тамал Абдулаевадив республикадин Кьил В.Васильева вахкана.
“Лезги газетдин” редакциядин коллективди Тамал Мирзоевнадиз ганвай награда ва алукьнавай ЦIийи йис мубаракзава, адахъ чандин сагъвал, хизанда бахтлувал хьун алхишзава.
Рагнеда Рамалданова
