Карчивилиз куьмек гун патал 2019-йисуз федеральный бюджетдай чи республикадин бюджетдиз чара ийидай субсидийрин санлай кьачур кьадар 531 миллионни 310 агъзур манатдиз барабар хьунин гьакъиндай разивал ганва.
“ГъвечIи ва юкьван карчивал ва карчивилел машгъул жез кIанзавайбурун теклифрин тереф хуьн” милли проектдин региондиз талукь проект Челябинск шегьерда декабрдин вацра кьиле фейи Вирироссиядин гъвечIи карчивилиз куьмек гунин рекьяй VIII конференциядал хвенай.
Дагъустан Республикадиз талукь программа РД-дин карчивилин ва инвестицийрин рекьяй Агентстводин руководитель Гьажи Гьасанова хвена. Адан гафаралди, милли проектдин сергьятра аваз, пландик квай мярекатар, 99 процент такьатар федеральный бюджетдай ишлемишна, уьмуьрдиз куьчуьрмишдайвал я.
“И такьатар гъвечIи ва юкьван карчивилел машгъулбурал жезвай административный пар кьезиларуниз, абуруз эменнидин жигьетдай гузвай куьмек гегьеншаруниз, чпин кеспидал машгъул агьалийриз къулай шартIар тешкилуниз, бизнесдиз куьмек гунин цIийи къайдаяр кардик кутуниз харжда”,— къейдна Гьасанова.
Лагьана кIанда хьи, конференцияди федеральный ва регионрин властдин, бизнес-жемиятдин, гъвечIи ва юкьван бизнесдиз куьмек гунал машгъул агентствойрин векилар, пешекарар сад авунвай. Вилик эцигнавай месэлаяр веревирд авуна Россиядин 85 региондин бизнесдиз куьмек гунин хиле зегьмет чIугвазвай тешкилатрин руководителри иштиракна. Шегьердин вад майдандал “Хъсанара”, “Арадал гъваш”, “Машгьур ая”, “Сад ая”, “Гегьеншара” секцияр кьиле фена, 2019-йисуз гъвечIи карчивилиз куьмек гунин кар алай рекьерикай рахана.
«Лезги газет»
