ЦIийи йис алукьдалди вилик гзафбуру йисан нетижаяр кьазва, авур-тавур крар веревирдзава, гележегдин планар язава. И жигьетдай Кьурагь райондин “Сельсовет Кочхюрский” МО-дин администрациядин кьил Жабраилов Аскер Руслановича ингье вуч лугьузватIа:
— Санлай къачуртIа, чи администрация ва Бугъдатепе хуьр патал 2018-йис рикIел аламукьдайди, пакадин йикъак умудар кутадайди хьана,- ихтилатдив эгечIна А. Жабраилов. — Квезни чизва, чи хуьрерин администрацийрин бюджет, мумкинвилер гегьеншбур туштIани, чна яргъандиз килигайвал кIвач гадарзава. Эхиримжи йисара агьалийрик Гуьлгери вацIай хуьруьз хквезвай рехъ авай гьалди, багълар, салар дигидай яд бес тахьуни, бязи куьчеяр татугай гьалдиз атуни секинсузвал кутазвай, абур чазни, райондин администрациядизни арзаяр авуниз мажбур жезвай. Чна и месэлаяр гьялуниз артух фикир гана. ЦIийи Макьарин хуьрелай чиниз хквезвай рехъ гьяркьуь хъувуна, къайдадиз гъана, муьгъни ремонтна ва 12 метрдин яргъи хъувуна.
Дигидай цин вири къанавар лиледикай, зирзибилдикай михьна. Гьайиф хьи, ида къанавра яд гзафарзавач. Чна яд “Самур-Дербент” къаналдай къачузвайди я, амма гатун вахтара анай бес кьадарда яд ахъайзвач. Гьавиляй агьалийри арзани ийизва. Чун и месэла гьялдай рекьерихъ къекъвезва.
Администрациядин кьили къейд авурвал, дигидай цин къурулуш Мегьарамдхуьруьн “Водрайондик” акатзава, адахъни виликан гьунарар амач. Гьавиляй къанавар михьдай мумкинвилер администрацияди жагъурна. Бугъдатепедин патав мадни гзаф хуьрер гва, “Самур-Дербент” къаналдай къачузвай яд пайи-паяр хъувурла, эхирдай кьуьчхуьрвийрив ахгакьзавайди стIалар я. Гуьлгери вацIай яд къачудай теклифар гудайбурни ава, амма и кар патал вацIал еке насосар эцигна кIанда. Ахьтин такьатар администрациядихъ авач.
Хуьруьн культурадин кIвал хъсан гьалда авачир. Администрацияди ам капитальнидаказ ремонтна. Мегьамед Ярагъвидин тIварунихъ галай куьчедиз чиргъ вегьена, ам къайдадиз гъана. Кьведра субботникар тешкилна ва хуьруьн мулкар зирзибилдикай михьна.
Агьалийрин кIвалера арадал къвезвай зирзибил махсус чкадиз тухудай автомашин кардик кутунва. Хуьруьн куьчейрин михьивилел гьамиша гуьзчивалзава. Администрациядиз гьар са карда райондин собранидин депутатар тир Хизри Мамедова, Саид Саидова ва гьакI агъсакъалрин Советдин председатель Мислимуллагь Мурадова, Абумуслим Абумуслимова, Къурбанисмаил Къурбанисмаилова, Эмирхан Мегьамедова куьмекар гузва. Сагърай чеб!
— Чи электрикдин линиярни татугай гьалда ава, — лугьузва А. Жабраилова. — И месэла гьялун патал райондин администрациядихъ галаз меслятар авунва ва къведай йисуз абур дегишардайвал я. Исятда 2038-йисалди хуьр вилик тухудай проектар гьазурзава. Аукцион тешкилайла, Нижний Новгороддай тир фирмади гъалибвал къазанмишна ва адан пешекарар хуьруьз атанва, абуру чпин кIвалах ийизва.
Республикадин 2019-йисан бюджетдик ЦIийихуьрелай (Новоаул) Бугъдатепедиз къвезвай 4 километр рекье асфальт тун кутунва. Райондин администрацияди Гуьлгери вацIун кьеряй къвезвай рекьин са километрдани асфальт твадайвал я.
Хуьре “Юг”, “Берекат”, “Нептун” ва “Бумеранг” СПК-яр кардик ква. Абуру цIи ципицIрин, техилдин, хутарин хъсан бегьерар вахчуна.
Заз къе жуваз авай мумкинвиликай менфят къачуна, вири хуьруьнвийриз, районэгьлийриз, милли газет кIелзавайбуруз алукьнавай ЦIийи йис мубаракиз кIанзава. Къуй гьар са ватанэгьлидин кIвале чимивал, къулайвал, берекат, асайишвал, сагъламвал артух хьурай!
Абад Азадов
