Гьар сеферда ЦIийи йис алукьдайла, инсанри ам гьихьтинди жедатIа лугьуз фикирзава. Мурадар тIалабзава Аллагьдивай. Ийидай, гъиле кьадай крар тайинарзава. ЦIийи йисак са гьихьтин ятIани умудар кутазва. ТIвар-ван авай астрологрини, аяндаррини йис гьихьтинди жедатIа, гьадакай чпин фикирар раижзава.
Астролог Павел Глобадин гафаралди, 2018-йисан сентябрдиз “чIулав” ва “лацу” Вацран арада битмиш хьайи аксивилин гьалар 2020-йисан эхирдалди давам жеда. И макъамда дуьньяда садани гуьзлемиш тийизвай хьтин дегишвилер кьиле фида. Россияда девлетлуйринни кесибрин арада мадни гзаф тафаватлувал, фаркь гьатда. 2019-йисан кьвед лагьай паюна пенсиядиз фидай вахт гзафарунихъ, налогрин кьадарар артухарунихъ, яшайишдин программаяр тIимиларунихъ галаз алакъалу яз халкьдин арада наразибур, гьатта гьукумдиз аксибурни гзаф жеда.
Глобади кьетIендиз фикир гузвай са кар мад ава – 2019-йисан 6-январдиз Варз кьун. Ида сиясатда аквадай хьтин дегишвилер твадай са бязи къал-макъалрал, къизгъинвилерал гъун мумкин я. Адан гафаралди, са бязи къуватрин мурад чи Президент къуллугъдилай алатун ятIани, Владимир Путин государстводин кьиле амукьда.
Россиядиз акси яз малумарнавай санкциярни тIимил жедач. Са рахунни алач, абуру уьлкведин экономика виликди финиз кьецI гузва. Гьа са вахтунда гьа санкцийри 2019-йисузни уьлкведин халкьдин майишатдин хейлин хилер, экономика пайгардик кухтуниз куьмекда. Импортдин гзаф товарар чкадинбуралди эвезда. Абур, еридал гьалтайлани, импортныйбурулай виняй жеда. Аяндарди гьисабзавайвал, Россиядин манатдин мягькемвал, дурумлувал агъуз аватдачтIани, уьлкведихъ анжах экономикадин кризисдин гьаларай тамамвилелди экъечIдай мумкинвал анжах къад йисалай жеда.
Гзафбуруз чизвай астролог Тамара Глобадин гафаралди, ВакIан йисуз Россиядин гзаф кьадар политикар чпин гьакъикъи къамат къалуруниз мажбурда. ХъуьтIуьз обществода девлетлуйрин ва кесибрин арада акси гьерекатар кьиле фида ва абур зур йисуз кьван давам жеда. 2019-2024 йисара уьлкве хейлин четинвилери гуьзлемишзава, гьавиляй агьалийриз пара кьадар сабурлувал ва секинвал герек къведа.
Тамара Глобади гьисабзавайвал, 2019-йисан гатуз уьлкведа тамари цIаяр кьунихъ, тIебиатдин ресурсар хкудунихъ галаз алакъалу яз экологиядин муракаб гьалар арадал къведа. Зулуз международный майданда кьиле тухудай крарик гьерекат акатда. Россиядинни США-дин арада акси акъвазунар давам жедатIани, ара-бир абуру сада-садахъ галаз меслятвилин, санал кIвалахунин алакъаярни тайинарда. Астрологдиз аквазвайвал, ВакIан йиса гележегда арадал къведай зурба дегишвилерин бинеяр кутада.
Астролог Светлана Драганан фикирдалди, Россия патал иллаки хъуьтIуьн вахт четинди, муракабди жеда. Сатурн Юпитердихъ галаз сад жезвай чIавуз руьгьдин ивиррин къиметлувал ужуз жедай кризис кьиле фида. Ихьтин четинвилерай уьлкве экъечIда ва ам диндин, руьгьдин жигьетдай цIийи дережадиз хкаж жеда.
Аяндарди лугьузвайвал, йисан сифте кьиляй банкарин къурулуш пайгардикай хкатда, мумкин я, манатни къуватдай аватун. Ида агьалийрин патай наразивилер, аксивилер арадал гъида. Къецепатан уьлквейри малумарнавай кIеви санкцийри Россия абурувай мадни яргъа ийида. Зулухъди хьиз гьалар са жуьреда пайгардик ахкатда. Идаз уьлкведа кьакьан технологийрин хилер вилик фини куьмекда.
Гьа са вахтунда С. Драгана гьисабзавайвал, Россиядин къенепата нарази къатарин кьадар артух жеда. Идаз килигна гьукуматди кIеви серенжемар кьабулун мумкин я. Мадни къейдзавайвал, декабрь вири дуьнья патал четинди, кризисар галайди жеда. ТIебиатдин ва техногенный мусибатарни арадал атун мумкин я. Россия и жуьредин вакъиайривай яргъа жеда, амма дуьньядин майданда кьиле фидай дегишвилерикай адавайни кьил къакъудиз жедач.
Алатай вахтарин аяндаррини кьилел къведай крарикай чпин фикирар тунва. ИкI, Франциядин машгьур астролог Нострадамуса лагьайвал, 2019-йис къалабулухдин вакъиайралди “девлетлуди” жедалда. США-динни Россиядин ва Китайдин арада авай гьалар къизгъин жезва. РагъакIидай патан Европади Россия чапхунчийрин жергедиз акъуднава. Нострадамусан текстериз баянар ганвайбуру гьисабзавайвал, 2019-йисуз, США ва Европа себеб яз, дяведин гьерекатар арадал къведа. Абуру Европа авайдалай усаларда.
Аяндарди лагьанвайвал, террористрин, экстремистрин дестейри мадни кьил хкажда. Чка-чкада абуру гзаф кьадар терактар ийида.
Ада хабар гузвайвал, “информациядин дяве” мадни къуватда гьатда ва адан майданарни гегьенш жеда. Гаф гапурдилайни хци жедалда. Дуьньяда ва иллаки Европада кьиле фидай дегишвилер себеб яз, хашпара дин усал жеда ва исламди вичин сергьятар мадни гегьеншарда.
Гьа са вахтунда Россияди вичи кьунвай рекьяй виликди еримишда ва ам вичин рекьелай алудиз садалайни алакьдач.
Алукьзавай йисуз тIебиатдин бедбахтвилерни (залзалаяр, яд акьалтунар, цIаяр кьунар) гзаф жедалда. Кьилди къачуртIа, США-да виридалайни мусибатдин залзала жедалда. Ахтармишунардайбуру къейдзавайвал, залзаладин кьил Калифорниядин ва Ванкувер островдин (Канада) арада хьун мумкин я.
Туьркиядин ва Ирандин мулкарал яд акьалтда. Дуьньядин майданда гьавадин шартIариз талукь дегишвилерни жедалда. Сифтедай садлагьана чимивал артух жеда. Идакди вирер кьурада, муркIар цIрада. Ахпа планета пис аязрин хура гьатда.
Эдгар Кейсидин фикирдалди, дуьньяда лап зурба дегишвилер кьиле фида. Абуру дуьнья са чкадал акъваз тавунвайди ва датIана гьерекатда авайди субутар хъийизва. Гьелбетда, аяндарри лугьузвай вири крар хъсанбур, къенибур туштIани, абуру гележегдик умуд кутадай мумкинвилер яратмишзава.
Вангадин гафаралди, дуьньядин майданда куьгьне къайдаяр квахьда ва цIийибур арадал къведа. Иллаки — РагъакIидай патан уьлквейра ва США-да. США-ди Россиядихъ галаз бягьс чIугун давамарда ва ам Россиядин къенепатан крарик къаришмиш жез алахъда. И сеферда Россияди адаз хъсан жаваб гуда.
Вангади Чил гзаф галатнавайдакайни ихтилат тунва. Имни акI лагьай чIал я хьи, вири дуьнья къарсурдай тIебиатдин завал – зурба вулкан винел экъечIун мумкин я. Идакди гзаф инсанар пуч жеда. ВакIан йисуз дуьньяда тIебиатдин завал жедайдакай аяндар Вера Лионани лагьана.
Вангадин гафаралди, 2019- йисуз Украина мадни кIеве гьатда ва ана сиясатдин жигьетдайни дегишвилер кьиле фида.
Аквазвайвал, фикирар (прогнозар) гьар жуьрединбур я. Вири, крар аяндарри лагьанвайвал бажагьат жеда. ЦIийи йисавай, гележегдивай чна, гьелбетда, хъсан крар, ислягьвал, инсанрин яшайиш хъсан хьун гуьзлемишзава. Иншаллагь, гьакI женни ийида.
Хийир Эмиров
