Мегьарамдхуьруьн райондин Приморск хуьре, вичин къуллугъдин везифаяр кьилиз акъуддайла кечмиш хьайи Махачкъаладин УВД-да кIвалахай милиционер, милициядин прапорщик Нажмудин Шагьпеленгов гьамишалугъ яз рикIера хуьнин кьул ачухунин ва куьче адан тIварунихъ ягъунин мярекат шад гьалара кьиле фена.

Мярекатда РД-да МВД-дин хсуси составдихъ галаз кIвалахунин рекьяй тир управленидин начальник, къенепатан къуллугъдин полковник Сахават Сахаватова, «Мегьарамдхуьруьн район» МР-дин кьилин заместитель Гьабибуллагь Мурадалиева, РД-дин МВД-дин къвалав гвай общественный советдин член Гьажимурад Зургъалова, Мегьарамдхуьруьн райондин общественный палатадин председатель Агъадаш Нагъметуллаева, райондин МВД-дин отделдин къуллугъчийри, Нажмудин Шагьпеленгован багърийри, Приморск хуьруьн администрациядин кьили, хуьруьн мектебдин директорди, мектебда кIелзавай аялри ва хуьруьн агьалийри иштиракна.

Рахунрин эхирдай Сахават Сахаватова РД-дин къенепатан крарин министр Абдурашид Мегьамедован ва министерстводин коллективдин патай Нажмудин Шагьпеленгован хизандиз чандин сагъвал хьун алхишна.

Мярекатдал кечмиш хьайи къуллугъчидин мукьва-кьилияр, хуьруьн администрациядин кьил ва масабур рахана.

«Лезги газет»