Алатай 2018-йисуз зегьметда, яратмишунра, ийизвай къуллугъра кьетIен агалкьунар хьайи, чи государстводин ва гьакIни маса рекьерай цIийи, чIехи тIварар, наградаяр къачур вири рухвайризни рушариз баркалла, аферин!
Чнани абуруз Аяз Бубадин тIварунихъай цIийи тебрикар рекье твазва. Абур чна алфавитдин къайда хвена чапзава.
Абдулаким Гьажимурадоваз, Сулейман-Стальский райондин дявединни зегьметдин, къанун-къайда хуьдай органрин ветеранрин Советдин председателдиз, РФ-дин ветеранрин Союздин Гьуьрметдин грамотадин сагьибдиз:
Килиг тийиз яшариз,
Физва кьакьан къашарихъ.
КIанда рикIиз и дуьнья
Женнет -багъдиз ухшариз.
Ариф Керимоваз, Москвада ФЛНКА-дин президентдиз, зегьметда къазанмишнавай агалкьунрай, общественный кIвалах активнидаказ тухунай РФ-дин Президентдин патай Чухсагъулдин чарчин сагьибдиз:
Лезгийрикай лезги хва,
РикI михьи тир гуьзгуь хва!
Зайиф тахьуй садрани
Ви таъсиб са жизви, хва!
Гелхенрин (Кьурагь район), Эминхуьруьн (Сулейман-Стальский район), Ярагъ-Къазмайрин ( Мегьарамдхуьруьн район), КъванцIилрин (Хив район) школайрин муаллимриз ва аялриз:
Эхирни куьн агакьна
Фад вилив хвей мураддив.
КIела, кIела, мад кIела,
Чирвал къачу устаддиз!
Гьажи Эмирсултановаз, Усугъчайдал чIехи хьана, Москвада тайский боксдал машгъул пагьливандиз, дуьньядин чемпионвилин чIулунин ва къизилдин медалдин сагьибдиз:
ТIвар вине хуьз сихилдин,
Женг чIугвазва жегьилди.
Къуй мад гъурай къизилар
Чи спортдин дехилдиз!
Замир Ашурбеговаз, Дербент шегьердин 15-нумрадин юкьван школадин ученикдиз, информатикадай Вирироссиядин школьникрин Олимпиададин гъалибчидиз:
Къуй дуьньядин олимпда
Машгьур хьуй вун гъалиб яз.
Акурди туш дагъвияр
Чирвилериз кесиб яз!
Зарина Рагьмановадиз, Кьурагь райондин Ашарин хуьруьн рушаз, Вирироссиядин жегьил журналистрин медиа-конкурсдин гъалибчидиз:
Акуна чи алемдиз
Къуват а ви къелемдин.
Агалкьуни тирвилин
Шадарна чун бегьемдиз.
Магьмуд Абдулкеримоваз, “Просвещение” фондунин президентдиз, чи девирдин чIехи ва гьуьрметлу меценатдиз:
“Люминари” — цIийи центр
Багъишна чи къелемриз.
Къуй ви тIварцIел дамахрай
Вири савад алемди!
Муьгьуьдин Улубеговаз ва Саид Эскерхановаз, Мегьарамдхуьруьн ва Ахцегь районрин культурадин хилен устадриз:
Манидинни макьамдин
Дестекрикай дестекар!
Майданар це илгьамдиз,
Эркекрикай эркекар!
Равидин Абдурагьимоваз, Сулейман-Стальский райондин КIварчагърин хуьруьнви, Кьиблепатан Дагъустандин жегьилрин Союздин кьил, Вирироссиядин чIехи форумдин гъалибчидиз:
Жегьилвилин гьевесдив,
Гьунардивди сересдин,
Ад вине тур чи халкьдин,
Дестек хьана терездин!
Фейзудин Ибрагьимоваз, Гилийрин хуьруьн (Мегьарамдхуьруьн район) устад багъманчидиз, “Регионрин къизилдин фонд” ордендин сагьибдиз:
Булвилелди емишар —
Ични чуьхвер, кишмишар
Агакьариз базаррив,
Кьил вине яхъ гьамиша!
Улубег Абейдуллаеваз, Мегьарамдхуьруьн райондин образованидин управленидин начальникдиз, РФ-дин образованидин министрдин Чухсагъулдин чарчин сагьибдиз:
Чирвилерин сергьятар
Къачунин кар регьятар
Ийизва гьар камуна,
Желбиз жегьил жуьрэтар.
Фируза Керимовадиз – машгьур меценатдиз, “Территория добра” фондунин регьбердиз, РФ-дин Президентдин патай Чухсагъулдин чарчин ва “Хайи чил кIан хьунай” — РД-дин гьуьрметдин знакдин сагьибдиз:
Ашукь руш чи Ватандал,
Гьакьван кIеви виждандал,
Чи гьуьрметрин туьнт къашар
Марф хьиз къурай ви тандал!
Шагьпаз Асахановаз, эминхуьруьнви хциз, меценатдиз, “Димитров кабель” ООО-дин тешкилатчидиз, Дагъустан Республикадин Гьуьрметдин грамотадин сагьибдиз:
РикIни, руьгьни гъил ачух,
ДатIана гуьгьуьл ачух,
Ви девлетрин сан хьурай
А кьил таквар гьуьл ачух!
Шамил Байрамбеговаз, хъукьвави хциз, хуьруьн майишатдин илимрин доктордиз, профессордиз, РАН-дин Астрахандин филиалдин чIехи къуллугъчидиз, РФ-дин тIебии илимрин Академиядин академикдиз:
Чилин девлетар, хуьруьндевлетар,
Гьар сад паталди кIвалиндевлетар
Мад пара хьурай, эксиквалтечиз,
Ви чирвилинни гъилин девлетар!
«Лезги газетдин» редакциядин коллектив
