Мектебра кIелзавай аялар санай масаниз тухун патал Сулейман-Стальский райондин умуми образованидин са жерге идарайриз куьгьнебурун эвезда цIийи автобусар ганва.
Автотранспортдин такьатар федеральный бюджетдин гьисабдай уьмуьрдиз куьчуьрмишзавай программадин сергьятра аваз къачунва, адан бинеда 10 йисалай артух вахтунда ишлемишнавай автотранспортдин такьатар цIийибуралди эвезун ава.
Россиядин Федерациядин Гьукуматдин 2018-йисан 8-августдиз кьабулай къарардал асаслу яз, Россиядин вири регионра школайрин автобусрин парк 2020-йисан 30-июндалди цIийи хъувун лазим я.
Идалай вилик чна программадин сергьятра аваз Дагъустандин мектебар патал 70 автобус чара авунвайдакай хабар ганай. Амма Россиядин просвещенидин министерстводи, республикадин игьтияжар аннамишна, мад 70 автобус маса къачун патал алава такьатар чара авунин гьакъиндай къарар кьабулна.
ЦIийи автобусар пайдайла, амал ийизвай асул шартI школайра кIелзавай аялар яшамиш жезвай хуьрер абуру чирвилер къачузвай мектебривай яргъа хьун я.
И мукьвара транспортдин цIийи такьатар ДаркIуш- Къазмайрин, Курхуьруьн 1-нумрадин, Сардархуьруьн, Уллугъетягърин ва Шихидхуьруьн школайрив агакьна. Ихтилат 22 пассажир патал чкаяр авай “ПАЗ” маркадин 2 ва 11 аял гьакьдай “Газель” маркадин 3 автобусдикай физва.
Транспортдин такьатар гьар жуьре хуьрерай тир аялар тарсариз ва тарсарилай алава мярекатриз махсус рекьерай гъун патал ишлемишун фикирда кьунва. Аялрин хатасузвал патал и автобусар махсус жуьреда тадаракламишнава, гьа жергедай яз ина ГЛОНАСС система кардик ква, ацукьдай чкаяр вири хатасузвилин чIуларалди, лишанралди таъмин я.
ЦIийи автобусрин еридиз райондин кьил Нариман Абдулмуталибов ва РД-дин Халкьдин Собранидин депутат Гьамидуллагь Мегьамедов райадминистрациядин са жерге маса къуллугъчиярни галаз килигна. Райондин кьили къейд авурвал, цIийи ва къулай автобусар образование виликди тухун патал лазим технический тадаракрин арада алава лап хъсан такьатар я.
“Дагъустандин Кьил Владимир Васильеван теклифдалди чи райондин мектебрив къе къулай 5 автобус агакьнава. Ида республикадин руководстводи чи аялривай – абур райондин центрада яшамиш жезвани, тахьайтIа, яргъал хуьрерай яни, гьадалай аслу тушиз, — ерилу образование къачуз хьун патал вири крар ийизвайди къалурзава. Им неинки рикIиз хуш вакъиа я, гьакI чи аялрин сагъламвилин ва хушбахтвилин патахъайни къайгъу чIугун я. Им чи халкьдин гъалибвилерикай сад я лагьайтIа жеда”, — къейдна ада.
“Школа патал автобусрин важиблувал екеди я. Инал чун аялар мектебдив агакьаруникай ва анай хутахуникай, экскурсийриз, районда кьиле физвай мярекатриз, олимпиадайриз, акъажунриз тухуникай ва са жерге маса къулайвилерикай рахазва. Нетижада аялриз ерилу образованидикай менфят къачудай мумкинвал жеда, абурун къанажагъ гегьеншарда. Чун умудлу я, и автобусра аваз агакьардай аялрикай гележегдин алимар, хуьруьн майишатдин, культурадин пешекарар, ватанпересар хкатда”, — лагьана Гьамидуллагь Мегьамедова.
Ада райондин вад мектебдин месэлаяр гьялунай РД-дин Кьилиз сагърай лагьана.
«Лезги газет»
