ЦIийи йисан вилик квай йикъара РД-дин эцигунрин ва ЖКХ-дин министерствода Азербайжандин Храх-Уба ва Урьян-Уба хуьрерай Дагъустандиз куьч хьанвай пуд хизандив кIвалерин сертификатар вахкуниз талукь шад мярекат кьиле фена.
Агьалийрив яшайишдин кIвалер къачудай ихтияр гузвай шагьадатнамаяр вахкудайла, Дагъустандин эцигунрин ва ЖКХ-дин министр Малик Баглиева къейд авурвал, и месэла 2011-йисалай республикадин кьиле авай ксарин гуьзчивилик квай. Гила РД-дин Кьил Владимир Васильеван чалишмишвилерин нетижада и месэладал кIукI гъиз — кIвалер къачудай такьатар жагъуриз алакьна.
2018-йисуз РД-дин Кьил и месэладик къаришмиш хьайила, пулдин такьатар жагъуриз алакьна. 14-февралдиз РД-дин Гьукуматдинни РФ-дин Минкавказдин арада “2025-йисалди СКФО вилик тухун” программадин сергьятра аваз и хуьрерин агьалийриз федеральный бюджетдай субсидияр гун къалурнавай икьрар кутIунна.
— Куьн хайи Ватандиз хтанва. Квез чир хьухь, и сертификатар вахкунилай гъейри, Дагъустандин эцигунрин ва ЖКХ-дин министерство квез кIвалер маса къачуз куьмекизни, лазим меслятар гузни гьазур я, — лагьана Малик Баглиева.
Мярекатдал гьакIни Храх-Уба ва Урьян –Уба хуьрерай тир ва чпиз Дагъустанда кIвал-югъ кутун патал гьукуматдин куьмек герекзавай агьалийрин сиягьдик 138 хизан (377 кас) квайди къейдна.
Чпин нубатдай яз, кIвалерин шагьадатнамаяр ганвай ксари кIвалериз талукь месэла са куьруь вахтунда гьялунай чухсагъул лагьана.
-Шад жедай кар я, чахъ гила гьамишалугъ кIвал ва хъсандаказ кIвалахдай, аялар чIехи ийидай мумкинвал хьанва. Чна и кардай уьлкведин ва республикадин кьиле авай ксариз сагърай лугьузва.
Арадал гъанвай къайдадин бинедаллаз, сертификат ганвай агьалиди кIвал вичи хкязава ва маса гуниз талукь (договор купли-продажи) ва я тайин пай къвезвай эцигунра иштиракунин икьрар кутIунзава. КIвалер маса къачун патал сертификатдин (пулунин) кьадар хизанда авай ксарин кьадардилай аслу я. РД-дин эцигунрин ва ЖКХ-дин министерстводин делилралди, и месэла гьялун патал федеральный бюджетдай 200 миллион манатдилай виниз ва республикадин бюджетдайни 10,5 миллион манат чара авунва. 2018-йисан июндин вацра 20 хизандив сертификатар вахканай.
РикIел хкин: 1991-йисуз СССР чкIайдалай кьулухъ Дагъустандинни Азербайжандин административный сергьятар государстводинбуруз элкъвена. Храх-Уба ва Урьян –Уба хуьрер вири патарихъай Азербайжандин мулкарин юкьва гьатна. Мулкар дегишаруниз талукь месэла гьялунин вахтар 2004-йисуз акьалтIнай.
«Лезги газет»
