РД-дин образованидин ва илимдин министерстводин пресс-къуллугъди хабар гузвайвал, милли “Образование” проектдин сергьятра аваз “Современная школа” проект уьмуьрдиз куьчуьрмишуни 2022-йисалди Дагъустандин мектебра 3 сменада кIелунин месэла гьялдай мумкинвал гуда.
Къейд ийин хьи, республикади школьникар патал алай аямдин образованидин вири къулай шартIар тешкилунихъ элкъуьрнавай федеральный 10 проектдикай 8-да иштиракзава. Дагъустанда «Кванториум», «IT- куб», технопаркар, бажарагълу аялар майдандиз акъуддай махсус центраяр ачухун планрик кутунва. Идалайни гъейри, РД-дин образованидин ва илимдин министерстводи регионда “Демография” проект уьмуьрдиз куьчуьрмишунизни фикир гуда. Адан сергьятра аваз аялар галай дишегьлийриз кIвалахал акъвазиз куьмекда.
2019-йисуз Дагъустанда цIийи 19 мектеб эцигун планрик кутунва. Алай вахтунда, санлай къачурла, республикада 1642 мектеб кардик ква. Анра 400 агъзурдалай виниз аялри чирвилер къачузва. Абурукай 2642 аялди 3-сменада кIелзава.
«Лезги газет»
