26-декабрдиз, ЦIийи йисан савкьат яз, Ахцегьа, Самур вацIун чапла пата гуьнедик райондин пожарный частунин (ПЧ-50) девирдин истемишунрив кьур дарамат ачухна, ишлемишиз вахкана. Суварин къайдадин шадвилин мярекатда райондин кьиле авайбуру, идарайринни карханайрин ва школайрин коллективри, гьакI теклифнавай юлдашри иштиракна. Ахцегь райондин кьил Осман Абдулкеримов, РД-дин МЧС-дин министр генерал Нариман Къазимагьамедов, адан заместителар, къунши районрин администрацийрин кьилер, багьа мугьманрин десте РДК-дин музыкантри зуьрне-далдамдалди къаршиламишна. Гьевескар артистри ва Алла Жалиловадин тIварунихъ галай искусствойрин школадин хореографиядин дестеди мярекатдин иштиракчийрин гуьгьуьлар шадарна.
— Къе Ахцегьа пожарный типовой часть ахъаюн – им эхиримжи йисара тахьай хьтин ва тебрикуниз лайихлу лишанлу вакъиа я, — лагьана мярекат ачухай “Ахцегь район” МР-дин кьил Осман Абдулкеримова. – Сифте нубатда, вичин заместителарни галаз атана, пожарный часть ачухзавай Нариман Къазимагьамедоваз, чи шадвал пайзавай Рутул, Докъузпара ва Сулейман-Стальский районрин кьилер тир Ибрагьим Ибрагьимоваз, Абдурагьим Алискероваз ва Нариман Абдулмуталибоваз жуван, райадминистрациядин ва депутатрин собранидин патай чухсагъул! Чпин везифайрив жавабдарвилелди эгечIуналди, эцигунрин кIвалахар вахтунда ва ерилудаказ бегьемарай устIарарни пара сагърай! Куьне чаз ЦIийи йисан лап хъсан савкьат багъишна. Частунин куьгьне дараматда къутармишдайбурун дестедиз чка хьанва. Къуй Ахцегь, гьакI къунши районрани цIаяр кьунар тахьурай, и часть герек текъведайвал! Нагагь гьахьтин дуьшуьш хьайитIа, инанмиш я хьи, чи пожарныйри чеб халис пешекарри, кьегьалри хьиз тухуда. Абуруз ина вири патарихъай лап хъсан шартIар тешкилнава… — тебрикдин гафарилай кьулухъ ада, райадминистрациядин патай пишкеш яз, пожарный частунин коллективдиз рангунин еке телевизор гана.
Микрофондихъ РД-дин МЧС-дин министр, генерал-майор Нариман Къазимагьамедов гала: — Гьуьрметлу ахцегьвияр, мугьманар! Ахцегьрин 50 лагьай ПЧ-ни кваз эхиримжи йисара чна Дагъустанда вижевай 35 пожарный часть эцигна, кардик кутунва. Къведай йисуз пожарный частунин гьа ихьтин гуьзел дарамат чна Сулейман-Стальский райондин КIварчагърин хуьрени ачухда. Хиве кьан, жуьреба-жуьре себебрикди Ахцегьрин ПЧ-50 са кьадар геж арадал атана. Кьилинди, квез хиве кьур кар чалай кьилиз акъудиз алакьна. Ишлемишиз сагъвал гурай, анжах цIаяр кьунар тахьурай. Бедбахтвилерин вилик пад кьадай серенжемар кьабулна кIанда. Дуьшуьшдикай менфят къачуналди, заз Ахцегь муниципалитетдин кьил Осман Магьмудовичаз чухсагъул лугьуз кIанзава. Шаксуз, адан алахъунар пара хьана ва и чилни ада чаз вацIун патав, гегьенш, къулай чкадал хкяна. Гьуьрметлу юлдашар, квез РФ-дин къутармишдайбурун пешекар сувар (ам 27-декабрдиз, къейдзава) ва алукьзавай ЦIийи йис мубаракрай! Чандин сагъвал, кIвалера саламатвал, гьуьрмет, берекат хьурай!
Шадвилин мярекатдин мирзевалзавайди тир райондин культурадин управленидин къуллугъчи, шаир Сулейман Сулейманова нубатдин гаф Сулейман — Стальский райондин кьил Нариман Шамсудиновичаз гана.
— Разивилелди къейдин, эхиримжи йисара Ахцегь райондин мярекатра чна мукьвал-мукьвал иштиракзава. И мукьвара са совещанидал РД-дин Кьил Владимир Васильева лагьайвал, чаз агалкьунар, гъалибвилер герек я. Къе гьакъикъатдани, гьахьтин шадвалдай югъ я. За Сулейман-Стальский районэгьлийрин патай квез ихьтин часть ачухун рикIин сидкьидай мубаракзава! Ахцегьа девирдин истемишунриз жаваб гузвай ихьтин часть хьунин себебкар ватанперес, генерал Нариман Магьмудович я. Къуй Дагъустанда ихьтин частар пара хьурай, бедбахтвилер, цIаяр кьунин дуьшуьшар ерли тахьурай!
Рахунрин арада ва гуьгъуьнайни Ахцегь РДК-дин гьевескар артистри (Таира Муспагьовади, Исмаил Ризаханова, Зульфия Велиевади, Фикрет Баширова, Мадрид Бигеева ва масабуру) чпин манийралдини кьуьлералди кIватI хьанвайбурун гуьгьуьлар шадарна.
Ингье, РФ-дин Гимндин гурлу ван акъатна. Ахцегь ПЧ-нин кьиле Дустов Ариф авай пожарный аскеррин къурулуш низамда акъвазнава. РФ-дин, РД-дин ва МЧС-дин пайдахар хкажна. Нариман Къазимагьамедова, адан заместитель, Жаруллагь Моллаева, Ахцегь райондин кьил Осман Абдулкеримова ва къунши районрин кьилери пожарный часть ачухунин лишанлу лент атIузва…
Мярекат мугьманар Ахцегь ПЧ-нин къурулушдихъ, ина яратмишнавай къулай шартIарихъ галаз таниш хьуналди ва мумкин тир чIуру дуьшуьшра пожарный бригадайри чпи тухудай кIвалах къалуруналди давам хьана.
Дашдемир Шерифалиев
