27-декабрдиз РД-дин Гьукуматдин Председатель Артем Здунован регьбервилик кваз Дагъустандин министррин кабинетдин заседание хьана. Идан гьакъиндай “Лезги газетдиз” РД-дин Кьилин ва Гьукуматдин Администрациядин пресс-къуллугъди хабар гана.
Сад лагьайди яз заседанидал РД-дин туризмдин ва халкьдин художественный сеняткарвилерин рекьяй министр Расул Ибрагьимова доклад авуна. Ада министерстводи тухвай кIвалахдин сифтегьан нетижаяр кьуна ва 2019-йисуз вилик акъвазнавай везифайрикай суьгьбетна.
Р.Ибрагьимова малумарайвал, 2018-йисан 10 вацран вахтунда республикадиз 604 агъзур кас туристар атана, къведай йисуз лагьайтIа, абурун кьадар 850 агъзур касдив агакьарда.
“Республикада туристар бинеламиш жедай 20770 койкадин махсус чкаяр, гьа гьисабдай 22 муниципальный тешкилатда 52 турбаза, санаторийрин 25 идара, 125 мугьманхана, мугьманар кьабулдай 40 кIвал ава. Идалай гъейри, 2018-йисуз кьилдин ксарин инвестицийрин гьисабдай 272 койкадин чкаяр авай 6 мугьманхана ишлемишиз вахкана, 5 мугьманханада авай шартIар ахтармишна ва абуруз тайин тир категорияр гана. Гила Дагъустанда 10 мугьманхана виниз тир ери авайбур тирди тайинарнава”, — малумарна Расул Ибрагьимова.
Министрдин фикирдалди, къведай йисуз туризмдинни экскурсийрин сеть вилик тухуниз кьетIен фикир гуда, алай вахтунда а сетдик 41 турмаршрут акатзава.
“Чна кардик квай маршрутрин машгьурвал хкажун, регионда кар алайбур тир маршрутар Россиядин ва международный майданда хъсандиз раиж авун пландик кутунва. Чна “Дагъустанда авай туриствилин маршрутар» тIвар ганвай мобильный приложение туькIуьрунин проект гъиле кьунва. Ам чна, сезон башламиш хьайила, кардик кутадайвал я. Ингилис чIалал кардик жедай туриствилин махсус интернет-портал, электронный ва печатдин цIийи продукция арадал гъида. Къведай йисуз чна лишанлу са жерге серенжемар – “Ачух Дагъустан” тIвар алаз туриствилин международный форум, “Дагъустандиз — мугьманвилиз” лишандик кваз международный гастрономический фестиваль, “Яру дагъ-2019” лишандик кваз экстремальный туризмдин международный фестиваль, балугъчивилин туризмдин регионрин уртах фестиваль кьиле тухуда”, — лагьана, кьилди къачуртIа, министрди.
2018-йисуз Дагъустан Республикадин Гьукуматди законрин проектар туькIуьрунин жигьетдай тухвай кIвалахдин нетижайрин ва 2019-йисуз РД-дин Гьукуматди законрин проектар туькIуьрунин жигьетдай тухудай кIвалахдин пландин гьакъиндай малумат региондин министррин кабинетдин Администрациядин Правовой управленидин начальник Анвар Халилова гана.
Адан гафаралди, законрин проектар туькIуьрунин кIвалах Дагъустандин Гьукуматдин кIвалахдин кьилин терефрикай сад я. Ида законрин бинедаллаз къайдадик кутазвай общественный алакъайрив комплекснидаказ эгечIдай, агьалийрин яшайишдин игьтияжрал аслу яз кIвалахдин асул терефар тайинардай мумкинвал гузва.
Докладчиди малумарайвал, 2018-йисан план, санлай къачурла, кьилиз акъуднава.
Идалай гъейри, 2018-йисуз маса законар кьабулунин барадайни еке кIвалах тухванва. Халкьдин Собраниди вири санлай Дагъустан Республикадин 102 Закон кьабулнава.
Къейд авурвал, 2019-йисуз законрин проектар туькIуьрунин кIвалахда исполнительный властдин органрин асул фикир образованидин, шегьерра эцигунар кьиле тухунин, чилиз талукь законодательстводин ва инвестиционный кIвалахдин барадай законар мадни хъсанарунал желбда.
Анвар Халилован рахунриз баян гуналди, премьер-министрди министррин кабинетдин членрин вири теклифар цIийи планда вилив хуьдайди къейдна. “Халкьдин Собраниди кьабулзавай вири законар кьилиз акъудун лазим я”, — рикIел хкана ада ва докладчидивай и барадай крар гьихьтин гьалда аватIа хабар кьуна.
Государстводин къуллугъдин, кадрийрин ва государстводин наградайрин месэлайрай РД-дин Кьилин ва Гьукуматдин Администрациядин Управленидин начальник Артур Исрафилован гафаралди, исполнительный властдин ва чкадин самоуправленидин органрин руководителрин ва абурун заместителрин, государстводин ва муниципальный карханайрин, идарайрин ва организацийрин руководителрин къуллугърал эцигдай ксар хкядай конкурсра гъалиб хьайибуруз ва финалистриз республикадин руководстводи кьетIен фикир гузва.
Ада къейд авурвал, алай вахтунда конкурсра гъалиб хьанвай 40 кас Дагъустан Республикадин государстводин властдин ва чкадин самоуправленидин органра жавабдар къуллугърал тайинарнава.
Артур Исрафилова конкурсра гъалиб хьайибурукай ибарат яз, республикадин руководстводин куьмекни галаз идара ийидай ксарин “Зи Дагъустан” клуб тешкилнавайди, ам республика вилик тухунин виридалайни важиблу месэлаяр веревирддай майдан тирди къейдна.
Докладчидихъ яб акалайдалай гуьгъуьниз Артур Здунова кадрияр хкягъунин ихьтин къайда вири хилера кардик кутун чарасуз тирдан гьакъиндай малумарна. “Земский духтур” ва “Хуьруьн муаллим” программайрайни кадрияр гьа и къайдада хкягъун лазим я. И месэладай медуниверситетдихъ ва педуниверситетдихъ галаз активдаказ алакъа хуьн лазим я. КIвалахиз хуьруьн чкадиз фин вучиз менфятлу ятIа, гьадан гъавурда тун важиблу я”, — лагьана ада.
«Лезги газет»
