И мукьвара чав шад хабар агакьна: чи баркаллу хва Ислам Рамазанова Москва шегьерда 31 уьлкведай атанвай 1700-далай гзаф спортсменрин арада пауэрлифтингдай (къуватдин троеборье) кьиле фейи акъажунра 82 кг-дин заланвал авай спортсменрин арада, 727,5 кг заланвал авай штангаяр хкажуналди, 1-чка кьуна, дуьньядин чемпионвилин тIвар къачуна. Ислама виридалайни къуватлу пуд спортсмендилай 42 кг гзаф хкажна.
Ислам спортдин кьакьан кукIушриз йигин камаралди экъечIна. Ада гзаф турнирра 1-чкаяр кьуна. Дагъустан, Чечен республикайрин чемпионвилин тIварариз лайихлу хьана. 2016-йисуз Георгиевск шегьерда кьиле фейи акъажунра Кеферпатан Кавказдин федеральный округдин чемпионвилин тIвар къазанмишна. 2017-йисуз Ставрополда кьиле фейи акъажунра — Россиядин, 2018-йисан гатуз Москвада -Европадин чемпионвилин тIварариз лайихлу хьана.
2017-йисуз Ислама, 690 кг-дин заланвал авай штангаяр хкажуналди, спортдин мастервилин, 2018-йисуз (727,5 кг хкажуналди) международный мастервилин тIварар къачуна.
Рамазанов Ислам Къурбанбегович 1991-йисуз Кьурагь райондин Усарин хуьре дидедиз хьана. Ам кьве хуьруьн (диде Гелхенай, буба — Усай), кьве миллетдин хва я. Спортдин и жуьредал 2010-йисалай машгъул жез башламишна. Ислам алай вахтунда Дербентда яшамиш жезва.
Ам викIегь спортсмен хьиз, хъсан ва рикI михьи инсан я. Вичелай алакьдай куьмекар гузни ам гьамиша чалишмиш жезва.
Жегьил спортсменди ДГТУ-да кIелна, диплом къачунва. Алай вахтунда ДИИК-дин физкультурадин факультетдин студент я.
Чи мурад пауэрлифтинг Олимпиададин къугъунрик акатун, Исламакай Олимпиададин чемпион хьун я.
Чи рикI алай газетдин къуллугъчияр – стхаяр ва вахар, къуй ЦIийи йисуз квехъ чандин сагъвал, рикIин шадвал хьурай! Лезги халкьдин арадай викIегь рухваярни рушар гзаф акъатрай!
Гьамзат Юсупов, Дербентдин социально-педагогический институтдин муаллим
