Мегьарамдхуьруьн райондай тир хуьруьн майишатдин метягьар гьасилзавай Фейзуддин Ибрагьимов «Карчивиле къазанмишай агалкьунрай» номинацияда «Регионрин къизилдин фонд» ва «Йисан инсан – 2018» премиядин сагьиб хьана. Идакай «Лезги газетдиз» Мегьарамдхуьруьн райондин администрациядин пресс-къуллугъди хабар гузва.

Премия регионар вилик тухунин «Перспектива» фондуни тешкилнава. ЦIийи йисан вилик Мегьарамдхуьруьн райондин кьил Фарид Агьмедова райадминистрацияда Фейзуддин Ибрагьимовав «Регионрин къизилдин фонд» лауреатдин диплом ва «Карчивиле къазанмишай агалкьунрай» номинациядай «Йисан инсан – 2018» гьуьрметдин лишан шад гьалара вахкана.

Райондин кьили хуьруьн майишат хкажунин карда зегьмет чIугвазвай ватанэгьлидиз хьанвай агалкьун тебрикна, адан адресдиз хуш келимаяр лагьана. Ада къейд авурвал, Фейзуддин Ибрагьимов хьтин ксар райондихъ мадни гзаф хьанайтIа, ахьтинбуруз администрация алакьдайвал куьмекарни гуз гьазур я, гьикI хьи, районда хуьруьн майишатдин хел лап кар алайбурукай сад я.

Шабагьар шад гьалара вахкунин мярекатда райондин Собранидин депутатрин председателди, райадминистрациядин жавабдар къуллугъчийри ва райондин хуьруьн майишатдин отделди иштиракна.

«Лезги газет»