Сулейман-Стальский районда саки 1000 гектар цик квачир чIурухъан чилер ава. Эхиримжи йисара абур ишлемишунин рекьяй кIвалах тухузва. Районда инвестицийрин проектар кардик кутуни адаз екедаказ куьмекзава. ИкI, Герейханован хуьруьн мулкуна марфадин къайдада яд гудайвал туькIуьрнавай 15 гектарда уьзуьмлухар кутунин проект уьмуьрдиз кечирмишзава. И кIвалах “Амир” КФХ-ди гъиле кьунва.
И йикъара райондин кьил Нариман Абдулмуталибов цIийи къайдада уьзуьмлухар кутазвай участокдиз фена, ам кIвалахар кьиле физвай гьалдилай рази яз амукьна.
Малум хьайивал, виликдай техилар цаз хьайи ва яд тагузвай участокда бегьерлу “Молдова” сортунин ципицIрин чубукар акIурзава. Аниз яд “Герейхановский” къаналдай насосдалди гуда.
“Амир” КФХ-дин кьил Къазиагьмед Къазиагьмедова лагьайвал, и къайдада кутунвай уьзуьмлухрин бегьерлувал 20-30 процентдин артух жеда.
Алай вахтунда районда уьзуьмлухри 1700 гектардин майданар кьунва. Ида районда уьзуьмчивал вилик тухузвайдан гьакъиндай шагьидвалзава. Уьзуьмчивал ва багъманчивал вилик тухунин нетижада агьалийриз кIвалахдин алава чкаяр жеда, райондин бюджетдиз къвезвай налогрин кьадарни артухарда.
Хазран Кьасумов
