21-декабрдиз Махачкъалада республикадин и ва я маса мярекатрихъ, вакъиайрихъ галаз алакъалу туризмдин хиле пуд лагьай сеферда кьиле тухвай конкурсдин нетижаяр кьуна.
Наградаяр гуз башламишдалди РД-дин туризмдин ва халкьдин художественный сенятрин министр Расул Ибрагьимова фестиваль кьиле тухунин карда иштиракай вирибуруз чухсагъул малумарна. КьетIендаказ ада майдандиз акъуднавай проектар муниципальный районра ва шегьерра уьмуьрдиз куьчуьрмишунал машгъул пешекаррикай лагьана. Ахпа гъалиб хьайибурув ва пишкешрин сагьибар хьайибурув фестивалдин иштиракчийрин дипломар вахкана.
Санлай къачурла, фестивалда, са шумуд номинациядин сергьятра аваз, Дагъустандин 20 райондай ва шегьеррай тир 28 проект майдандиз акъуднавай. “Агроэкотуризм” хиляй сад лагьай чка “Ахцегьрин ичерин сувар” проектдай Ахцегь районди кьуна. И проектдин руководитель Ахцегь райондин администрациядин физический культурадин, спортдин, жегьилрин ва туризмдин крарай отделдин кьилин пешекар Назиля Исмаилова я.
Чна проектдин руководителдиз ва вири дестедиз и агалкьун тебрикзава!
«Лезги газет»
