24-декабрдиз Мегьарамдхуьруьн райондин администрацияда и муниципалитетдин кьил Фарид Агьмедован регьбервилик кваз райондин кьилин заместителрихъ, администрациядин къурулушдик акатзавай подразделенийрин руководителрихъ, отделрин начальникрихъ галаз семинар-совещание кьиле тухвана. Анал район яшайишдинни экономикадин жигьетдай вилик тухунин барадай къазанмишнавай нетижаяр веревирдна, райондин экономикадин, яшайишдин вири хилера авай гьаларал акъвазна.
Асул делилрал фикир желб авуналди, Фарид Агьмедова малумарна: “Гьар са район вилик фин сифте нубатда экономикада къазанмишзавай нетижайрихъ галаз алакъалу жезвайди я. Экономика дурумлудаказ вилик фин, яшайишдин гьалар мягькембур хьун таъминарун, тайинарнавай дережайрив агакьарун – гьа им чи вилик акъвазнавай асул-везифа я”.
Райондин кьили мадни къейд авурвал, тухванвай кIвалахдин нетижаяр веревирд авуни муниципалитет вири терефрихъай вилик физвайди аквадай, гьелбетда, вилик акъвазнавай месэлаяр гьялунин рекьер тайинардай мумкинвал гузва. Вилик акъвазнавай везифаяр гьихьтинбур ятIа, малум я. Абур гьялунив мадни мукьуфдивди эгечIун, экономикада вилик финин еришар агъузар тавун, бюджет ахцIурун, яшайишдин жигьетдай хивез къачунвай вири мажбурнамаяр кьилиз акъудун герек я.
Совещанидал Россиядин Президентди, Дагъустандин руководстводи тайинарнавай кар алай везифайрал ва район Стратегиядин жигьетдай вилик тухунин месэлайрал акъвазна.
“Райондин чкадин самоуправленидин органри тайин тир са нетижа къазанмишунин къаст авай сад тир команда яз кIвалахун лазим я. Кьилди къачуртIа, экономика мягькемарун, агьалийрин яшайишдин ери хкажун герек я. И кар вирида аннамишун ва районда вири къурулушрин, органрин руководителри и макьсаддив агакьдайвал кIвалахун лазим я. Ида санлай чи халкьдин гьал-агьвал хкаждай мумкинвал гуда. КIвалахдив и тегьерда эгечI тийиз хьайитIа, идакай гьар са касди вичиз нетижа хкудун герек я”, — къейдна райондин регьберди.
Экономикада къазанмишнавай нетижаяр веревирддай чIавуз Фарид Агьмедова агьалияр, общественность вилик акъвазнавай кар алай везифайрин гъавурда тун чарасуз тирдал фикир желбна. Вири санал вилик фин, са рекье аваз виликди еримишун ва тайин нетижа къазанмишиз жедайвал кIвалахун герек я.
«Лезги газет»
