21-декабрдиз РД-дин Гьукуматдин Председателдин заместитель Рамазан Жафарован регьбервилик кваз рекьера гьерекатдин хатасузвал таъминарунин жигьетдай Дагъустан Республикадин Гьукуматдин комиссиядин заседание хьана.
Республикадин рекьера гьалар гьелелиг муракаббур яз амукьзавайди къейд авуналди, Рамазан Жафарова, кьилди къачуртIа, лагьана: “Ислягь девирда, рекьерин гьерекатдин иштиракчийрин къайгъусузвал себеб яз, ислягь агьалияр телеф хьуниз рехъ гана виже къведач. Ихьтин крарин вилик пад кьунин серенжемар кьабулзаватIани, гьелелиг бедбахтвилин дуьшуьшар арадал къвезма. Агьалийрин арада вахт-вахтунда гъавурдик кутунин кIвалах тухуни, рекьера гьерекат авунин къайдаяр чIурунин дуьшуьшар ашкара ийидай фото-видео – камераяр эцигуни рекьера транспортдихъ галаз алакъалу аварияр (ДТП) хьунин дуьшуьшрин кьадар тIимил хьунал гъизва. Амма чун къазанмишнавай нетижайрал рази хьана акъвазна виже къведач. Вилик гьялна кIанзавай хейлин месэлаяр кумазма. Чаз рекьера гьерекат авунин къайдайрал дуьзгуьндаказ амал ийиз чир хьайи дуьшуьшда и карда къайдани тваз жеда”.
Гуьгъуьнлай заседанидал республикадин рекьера гъиле авай йисан 11 вацран вахтунда аварияр хьунин жигьетдай арадал атай гьалариз талукь доклад МВД-дин ГИБДД-дин РД-да авай Управленидин начальник Александр Шалагина авуна.
Адан гафаралди, гъиле авай йисан 1-декабрдалди республикада 1585 ДТП хьана. И дуьшуьшрик 329 кас телеф хьана, хирер хьайибурун кьадар 2426 касдив агакьна.
“Алатай йисан талукь девирдив гекъигайла, рекьера транспортдихъ галаз алакъалу аварийрин кьадар 5,7 процентдин, телеф ва хирер хьайибурун кьадар лагьайтIа, талукь тирвал, 18,4 ва 6,8 процентдин тIимил хьана”, — малумарна Александр Шалагина.
Заседанидал автомобилрин рекьер ва ракьун рекьерин переездар авай гьал ахтармишунин нетижаярни веревирдна.
Мярекатдин иштиракчияр РД-дин «2015-2020-йисара республикада общественный къайда хуьн таъминарун ва тахсиркарвилериз аксивал авун» госпрограммадин “2015-2020-йисара рекьера гьерекатдин хатасузвал артухарун” подпрограмма кьилиз акъудзавай гьалдикайни рахана.
Заседанидин сергьятра аваз федеральный «Кавказ» шегьре рехъ цIийикIа туькIуьр хъувунихъ ва гегьеншарунихъ галаз алакъалу яз, адан кьилелай цавай элячIдай рехъ туькIуьрунин патахъай Къарабудахкент райондин Агачаул хуьруьн агьалийрин тIалабунизни килигна.
«Лезги газет»
