И йикъара Докъузпара райондин ЦIийи Къаракуьре хуьруьн ДЮСШ-да Афгъанистанда интернациональный буржи тамамардайла игитвилелди кечмиш хьайи усугъчайви, Яру Гъетрин ордендин сагьиб Сократ Гьажиевич Гьажиев рикIел хкуниз талукьарна, волейболдай районрин уртах турнир кьиле фена.

Санлай къачурла, турнирда Докъузпара, Ахцегь ва Рутул районрай 2001-йисуз дидедиз хьайи ва адалайни жегьил волейболистрикай ибарат ругуд командади иштиракна.

Акъажунар эгечIдалди вилик спортсменриз тебрикдин гафар Докъузпара райондин кьилин заместитель Салигь Гьажимурадова, райондин спортдин, жегьилрин сиясатдин ва туризмдин начальник Агъашериф Агъаширинова лагьана. Иштиракчийриз абуру турнирда агалкьунар хьана кIанзавай гафар лагьана, алукьзавай ЦIийи йис мубаракна.

Жегьил волейболистар акъажунриз хъсан гьазур хьанвай. Турнирдин нетижада сад лагьай чка Рутул райондин командади, кьвед лагьай чка Докъузпарадин командади кьуна. Пуд лагьай чка ахцегьвийриз амукьна. Гъалибчийризни хъсан чкаяр кьурбуруз кубокар, медалар, пишкешар ва пулдин премияр гана.

Къейдна кIанда хьи, Сократ Гьажиеван къамат рикIел хкуниз талукьарнавай турнир Докъузпарада гьар йисуз кьиле тухузва. Акъажунрин эхирдай Агъашериф Агъаширинова иштиракчийриз, мугьманриз, гьакIни районда спорт вилик тухуник чпин кьетIен пай кутазвай Гьажиеврин хизандизни чухсагъул малумарна.

«Лезги газет»