“Хайи Дагъустан” региональный общественный гьерекатди ва “Халкьдин фикир” фондуни республикадин инсанривай нубатдин сеферда социологиядин хабарар кьуна. Нетижада “2018-йисан лап хъсан тележурналист” номинациядай гъалиб хьайиди яз гьисабна: республикадин тIвар-ван авай политикадин ва жемятдин деятель, публицист, Россиядин МедиаСоюздин Дагъустандин отделенидин председатель, РД-дин Общественный палатадин, Вирироссиядин халкьдин фронтдин региональный штабдин член, “Дагъустан” ГТРК-дин общественно-политический телевиденидин руководитель, ДГУ-дин СМИ-рин электронный кафедрадин заведующий Ильман Алипулатов.
ДГПУ-дин профессор, вичин ери-бине Сулейман-Стальский райондай тир Шайдабег Айдабегович Мирзоева РД-дин Кьилин грантар патал малумарнавай конкурсда гъалибвал къачуна. Владимир Васильеван грантриз 43 проект лайихлу хьана. Абурун арада Ш.Мирзоеван “Расул Гьамзатован эсеррихъ этнокультурадин жигьетдай авай мумкинвилер кIелзавайбуруз руьгьдинни ахлакьдин тербия гунин акьалтI тийир чешме я” проектни ава.
РД-дин образованидин ва илимдин министерстводи “2018-йисан виридалайни хъсан жегьил алим” лишандик кваз кьиле тухвай республикадин конкурсда 43 касди иштиракна. Абурун арада илимдин докторар, кандидатар ва аспирантар авай. Шад жедай кар ам я хьи, чи ватанэгьли, Россияда илимрин виридалайни жегьил доктор яз гьисабзавай Заур Алисултанова “Естественные науки” номинацияда 1-чка кьуна. Къейд ийин хьи, алай вахтунда физикадинни математикадин илимрин доктор З.Алисултанова ДГУ-да ва РАН-дин ДНЦ-дин физикадин Институтда кIвалахзава.
Сулейман-Стальский райондин администрациядин жегьилрин парламентдин куратор, райондин собранидин депутат Мегьамед Алиева РД-дин жегьилрин крарин рекьяй министерстводи аялрин ва жегьилрин общественный тешкилатрин регьберрин арада малумарай “XXI асирдин регьбер” конкурсда 18 йисалай виниз яшара авайбурун арада 1-чка кьуна.
Лагьана кIанда, и конкурсдин федеральный этап Москвада кьиле фида. Регионра 1-чкаяр кьурбуру Россиядин меркезда кьиле фидай акъажунра иштиракда. Мегьамед Алиеван гафаралди, алай вахтунда Дагъустандин хуьрера чпихъ жуьреба-жуьре рекьерай алакьунар авай жегьилар гзаф ава, амма абур хъендик кумукьзава. Шегьерда яшамиш жезвай жегьилрихъ и рекьяй мумкинвилер гзаф ава. Депутатдин фикирдалди, хуьрера яшамиш жезвай жегьилриз куьмекдай тайин макьсаддихъ элкъуьрнавай махсус программа кьабулун герек я. М.Алиевахъ и месэла Москвада кьиле фидай этапдин сергьятра аваз къарагъардай ният ава.
Мукьвара Дербентда ингилис чIаларин муаллимрин арада Вирироссиядин конкурсдин “Учитель года-2019” региондин этап кьиле фена. Ана Кьиблепатан Дагъустандин районрайни шегьеррай 9 муаллимди иштиракна. Конкурсда 1-чка Мегьарамдхуьруьн райондин М.Гьажиеван тIварунихъ галай 1-нумрадин юкьван школадин муаллим Таира Темирхановади кьуна. Ада конкурсдин Махачкъалада кьиле фидай республикадин этапда иштиракда.
24-декабрдиз Махачкъалада, РД-дин писателрин Союздин дараматда, Дагъустандин халкьдин шаир Юсуп Хаппалаеван тIварунихъ галай премияр вахкуниз талукьарнавай мярекат кьиле фена. Къейд ийин хьи, и премия тешкилайдалай кьулухъ цIи ирид йис алатнава. Премия лагьайтIа, чпихъ яратмишдай алакьунар авай бажарагълу жегьилар руьгьламишун патал шаирдин веледри арадал гъанвайди я.
Алай йисуз Ю.Хаппалаеван тIварунихъ галай премиядиз лезги руш, ДГУ-дин магистрант Марина Ибрагьимова лайихлу хьана. Ада алай вахтунда “Хайи чIаларал аудиоктабар” проектдин винел кIвалахзава.
Агалкьунар виридаз мубаракрай! Къуй гележегда чав мадни гзаф муштулухар агакьрай!
«Лезги газет»
