23-декабрдиз Мегьарамдхуьруьн районда, Абрек Гьажиев рикIел хкуниз талукьарна, волейболдай рушарин арада гьар йисуз тешкилзавай районрин уртах турнир кьиле фена. Идакай «Лезги газетдиз» Мегьарамдхуьруьн райадминистрациядин пресс-къуллугъди хабар гузва. 

Турнир 2-нумрадин ДЮСШ-да кьиле фена. Ана МР-дин Собранидин депутатрин Председатель Н.Алиярова, ЦЗН-дин директор М.Гьажиева, МРЭС-дин начальник М.Агьмедова, УО-дин пешекар Л.Муртазалиева, бязи хуьрерин кьилери, тренерри, волейболистрин дестейри ва хейлин тамашачийри иштиракна.

Мегьарамдхуьруьн, Ахцегь ва Кьурагь районрай рушарин ирид командади иштиракна. Нетижада 1-чка Кьурагь райондин командади, 2-чка Мегьарамдхуьруьн райондин командади ва 3-чкани Ахцегь райондин командади кьуна. Гъалибчийрив Абрек Гьажиеван тIварунихъ галай кубок вахкана. Муькуь командаярни талукь тир грамотайралди ва медалралди къейдна.

«Лезги газет»