РД-дин Халкьдин Собранидин депутат, экономикадин, инвестицийрин ва карчивилин рекьяй комитетдин председателдин заместитель Фирудин Ражабов «100 мектеб» программадин сергьятра аваз Докъузпара райондин Къалажух ва Къаракуьре хуьрерин мектебрин дараматар ремонтунин кIвалахрихъ галаз таниш хьана.
РД-дин НС-дин аппаратдин информациядинни аналитикадин отделди «Лезги газетдиз» хабар гузвайвал, депутатди райондин ва хуьрерин активдихъ галаз кьве мектебда кьиле физвай ремонтдин кIвалахриз чкадал фена килигна.
«100 мектеб» проект РД-дин Кьил Владимир Васильеван теклифдалди арадал гъанва. Республикадин сергьятра и проект уьмуьрдиз кечирмишунин месэла РД-дин экономикадин ва территорияр вилик тухунин министерстводин хиве тунва.
Малум тирвал, Къалажух ва Къаракуьре хуьрерин мектебрин ремонтдин кIвалахар саки куьтягь хьанва.
Ф.Ражабова жуьреба-жуьре месэлайрин гьакъиндай хуьрерин агьалиярни кьабулна, муаллимрин коллективдихъ галазни гуьруьшмиш хьана. Дагълух хуьрерин агьалийри газификациядин, рекьер ремонт авунин месэлайрин патахъай депутатдивай куьмек тIалабна.
Къейд ийин, Фирудин Ражабов Докъузпара райондин патай хкянавай РД-дин Халкьдин Собранидин депутат я. Адан ери-бине Докъузпарадин Текийрин хуьряй я.
«Лезги газет»
