Дуьньядин винел вичин хайи чIал авачир са халкьни алач. Дидед чIал чаз дидедин некIедихъ галаз атанвай, дамарра авай иви хьиз, кьиле мефт хьиз герек такьат я.

Лезги чIал, дуьньядин амай халкьарин чIалар хьиз, девлетлуни я, къиметлуни. Амма, гьайиф хьи, са бязи инсанри, дидед чIал  гьина герек къвезвайди я лугьуз, кваз такьазвай чкаярни ава. ЧIалавай  яргъаз хьун – кесибвал ва бедбахтвал тирдан гъавурда геж акьада.

Шегьерра яшамиш жезвай аялривай, хайи хуьруьз хтайла, бегьем гъавурда гьат тийиз, чпин фикир дидед чIалал лугьуз тежез, къерехда амукьзава.

Советрин гьукуматдин девирда чун вири Махачкъаладай гьар пакамахъ ва нянихъ лезги чIалал тухузвай передачайрихъ, нефес акъуд тийиз, яб акализ акъваздай. Анай чаз манийрин,  шаирри кIелзавай шииррин ванер къведай. Эгер телевиденидин нубатдин программадик, вири миллетрин хьиз, чи чIалан  манияр квачиз хьайитIа, зенгер ийиз, жуван наразивал къалуриз жедай.

Алай вахтунда лезги передачайрихъ яб акалзавай гьам жегьилрин, гьам аялрин кьадар лап тIимил я. Йис-сандавай дидед чIалан тарсариз къвезвай аялрин кьадарни тIимил хьуни чак къурхулувал кутазва.  Чна чи чIал квахьуниз рехъ гана кIандач.

Дидед чIал хуьнин, адан важиблувилин гъавурда тваз алахъна кIанда. И карда диде-бубайрин зегьметрихъ еке метлеб ава. Чна дидед чIалал кIвалахни ­ийизва, адал дамахни…

Зи дамаррай физва иви лезгидин –

Хуьх лезги чIал, хуьх лезги чIал, лезгияр!

Зи къеневай рикI я лезги игитдин –

Хуьх лезги чIал,  хуьх лезги чIал, лезгияр!

 

Лезгияр чи чкIанва къе виринра –

Бакудани, Камчаткада, Москвада.

Лезгияр я алимарни шаирар –

Хуьх лезги чIал, хуьх Лезгистан, лезгияр!..

Мерзия ЧЕЛЕБОВА,  Республикадин образованидин  центрада лезги чIалан муаллим