И йикъара Дагъустандин Огни шегьердин М-С.Умаханован тIварунихъ галай спортдин мектебда 2003-2004-йисара дидедиз хьайи жегьилрин арада боксдай Рд-дин Кьиблепатан зонадин турнир кьиле фена. Идакай «лезги газетдиз» Мегьарамдхуьруьн райондин администрациядин пресс-къуллугъди хабар гузва.
Акъажунра республикадин шегьеррайни районрай 70-далайни гзаф боксерри иштиракна. Боксдай Дагъустан республикадин кIвенкIвечивал патал кьиле фидай акъажунриз лап хъсан спортсменар хкягъун патал кьиле фейи зонадин паюна Мегьарамдхуьруьн райондин боксеррини агалкьунралди иштиракна.
ИкI, Саид Къазимегьамедова ва Султангьамид Шамсудинова сад лагьай чкаяр, Вадим Шафиева кьвед лагьай чка кьуна. Къейд ийин, и боксерар тренерар тир Эльман Къазимегьамедован ва Мирзе Сефибегован регьбервилик кваз боксдал машгъул я.
Акъажунрин нетижада гъалиб хьайибурузни приздин чкаяр кьурбуруз грамотаярни медалар гана.
«Лезги газет»
