И йикъара чав чIулав хабар агакьна. Яргъалди чIугун тавур залан азардикди тIвар-ван авай меценат, РД-дин Халкьдин Собранидин депутат, “АРСИ” ЗАО-дин генеральный директор, хиневи хва Владимир Ашурбегович Ашурбегов рагьметдиз фена.
В.А.Ашурбегов 1957-йисуз Кьурагьрин хуьре къуллугъчидин хизанда дидедиз хьана. Ери-бине Ахцегь райондин Хинерин хуьр я.
Дагъустандин политехнический институт (гила Даггостехуниверситет) акьалтIарна, Владимир Ашурбеговича Советрин Армиядин жергейра къуллугъна. 1982-1987-йисара Дагъустандин эцигунрин Управленида мастервиле, прорабвиле, участокдин начальниквиле кIвалахна.
1987-йисуз ада эцигунрин вичин кархана арадал гъана. Гуьгъуьнлай адакай “АРСИ” тIвар алай ЗАО хьана, Владимир Ашурбеговни адан генеральный директорвиле хкяна. Чи республикадин шегьерра ва гьакI адалай къецени “АРСИ”-ди эцигнавай кьакьан мертебайрин тамам районар арадал атанва. Ада гьакI вишералди фялейриз, техникризни инженерриз кIвалахдай чкаяр артухарна.
Меценат яз, В.Ашурбегова хейлин манидарриз, артистриз, яратмишдай ксариз куьмекар гузвай. Неинки концертар, выставкаяр, килигунар тешкилиз, гьакI — кIвалералдини.
“Лезги газет” патал ам халисан амадаг, адал ашукь кас тир.
Депутат Владимир Ашурбегович Ашурбегова гьам бубайрин ватан Ахцегь районда, гьам хайи республикада яшайишдинни экономикадин, культурадинни спортдин, медицинадинни образованидин хилер вилик финик, рекьерни муькъвер эцигуник лайихлу пай кутуна. Адан зегьметар РД-дин Гьукуматдин ва Халкьдин Собранидин гьуьрметдин грамотаяр, РД-дин лайихлу, РФ-дин гьуьрметлу эцигунардайди тIварар гуналди къейднава.
Руьгьдай хци, ахлакьдиз михьи, къуватрив ацIанвай и касдихъ чIехи мурадар генани авай. Амма залум ажалди а мумкинвал ганач.
Чна рагьметлудан хизандиз, мукьва-кьилийриз, багърийриз, вири хиневийриз ва ахцегьвийриз, “АРСИ”-дин коллективдиз, дериндай хажалат чIугунивди, башсагълугъвал гузва. Владимир Ашурбеговичан экуь къамат садрани чи рикIелай алатдач.
«Лезги газетдин» редакциядин коллектив
