И чар кхьиниз зун “Лезги газетдин” 49-нумрадиз акъатнавай Дагъустандин халкьдин писатель Абдуселим Исмаилован “Кьабулиз тежедай савкьат” кьил ганвай макъала кIелайла, мажбур хьана. ГьикI хьи, авторди, шаирдин юбилейдихъ галаз алакъалу яз Ф.Нагъиева гьазурай, Даггизди акъуднавай “Етим Эмин. Пагь, чи уьмуьрар…” ктабдикай гьакъикъи ватандашди, лезги халкьдин руьгьдин кьакьан кукIушрикай сад тир Етим Эминан ирсинин къайгъударди хьиз, намуслувилелди, гъейратлувилелди, гьахъунин тереф хвена, акьалтIай жавабдарвилелди кхьенва. Зун гъавурда акьурвал, дугъриданни, чIехи классикдин ирсинив цIийи ктаб гьазурай алим вичин рикIел акьалтайвал эгечIнава, Эминан хатIуниз жавабдарсузвилелди кьацI янава. Гьихьтин гуьзел эсеррик вичин къаришмаяр кутуналди, михьи чешме рагъуларнава.
Им бес ахьтин ирсинив эгечIдай тегьер яни?
Эминан, Сулейманан, Саидан, Алирзадин ва маса классикрин ирсини чун, лезгияр, хкажзавайди я.
Чна вучзава? Дугъриданни, Эминан юбилейдин мярекатдал Сулейман-Стальский райондин кьил, камаллу алим Нариман Шамсудинович Абдулмуталибова лагьайвал, “эминоедар” артух жезва. Амма чаз гьакъикъи эминоведар кIанзава!
Халисан илимдарар кисна акъвазайла, тапан илимар гвайбуру майдан кьадай адет я.
Даггизда лезги ктабрин редактор, машгьур публицист, литературадин критик, шаир ва таржумачи, вичиз Етим Эминан ирс гьакьван дериндай чизвай Дагъустандин халкьдин шаир Арбен Къардаша ихьтин кардиз гьикI рехъ ганатIа, дикъет квадарнатIа, и кардал зун пара тажуб я.
“Эмин чи вири я!” — лагьанва Дагъустандин халкьдин шаир Ханбиче Хаметовади. Шаирдин ирс ахтармишай вири алимри, Гьажибег Гьажибеговалай гатIунна, Агьед Агъаев, Ражидин Гьайдаров, Руслан Къадимов хьтин авторрал къведалди, Эминан ирс патан рукварикай михьидаказ хуьн патал гьарда вичивай жедайвал алахъунар авуна.
Бес гила? Халкьдиз акьван сейли хьанвай манийрин чIалар жуван хушуниз кIанивал авун?.. Им неинки гьайиф, гьакI айиб къведай кар тирди алим Фейзудин Нагъиева аннамишначни?!..
Эминан ирсинив эгечIзавай вири авторриз заз са меслят къалуриз кIанзава: эгер квез адан чIаларик са гьикI ятIа хуькуьриз, икI ва я акI “туьхкIуьриз” кIанзаватIа, сифтени-сифте гьадал Вичел алукьна кIанда! Жедай кар тушни?
Тушиз хьайила, виш йисара халкьди хвенвай ирсинал гила лекеяр вучиз вегьезва? Нариман Шамсудиновича, гьакI Абдуселим Исмаиловани лугьузвайвал, хуькуьрмир чи чIехи шаирдик, адан зурба ирсиник! Чи руьгьдин кьакьанвилик!..
Шихсефи Сефиханов, экономикадин илимрин кандидат, общественно-политический деятель, “Самур энерго” ООО-дин гендиректор, информациядин международный академиядин академик
